ԵՐԵՎԱՆ, 10 հուլիսի - Sputnik. Արցախից բռնի տեղահանված Երվանդ Աղաբալյանի նկատմամբ դատարանը նշանակել է տնային կալանք՝ 2 ամիս ժամկետով։ Այս մասին իր ֆեյսբուքյան էջում գրել է փաստաբան Ռոման Երիցյանը։
Հայտնել ենք, որ հունիսի 16-ին Երվանդ Աղաբալյանը կալանավորվել էր մեկ ամիս ժամկետով։ Նա մեղադրվում է խուլիգանության մեջ` հունիսի 12-ին ԱԺ–ի շենքի մոտ դատարկ պլաստմասե շիշ նետելու համար։
«Քննիչի միջնորդությունն այն աստիճան անհիմն էր, որ Հյուսիսային Կորեայի դատարանն անգամ այն չէր բավարարի։ Բայց դե մեր «ժողովրդավարական» երկրի դատավորներից Ջոն Հայրապետյանը, իրավական ու փաստական հիմքերի ակնհայտ բացակայության պայմաններում, որոշեց 1 և 3 տարեկան երեխաների հոր, թոշակառու ու հիվանդ ծնողների որդու և վերջապես բռնի տեղահանված ընտանիքի միակ կերակրողի նկատմամբ նշանակել տնային կալանք՝ զրկելով նրան ընտանիքը կերակրելու հնարավորությունից»,– գրել է նա։
Երիցյանը նշել է, որ դատավորն ու քննիչը ենթադրել են, թե Հայաստանում անհնազանդության ակցիաները հնարավոր է` շարունակվեն, իսկ Երվանդն էլ, մասնակցելով դրանց, կարող է կատարել նոր հանցանք։
Հիշեցնենք, որ հունիսի 12-ին ԱԺ–ի շենքի մոտ բախումներ սկսվեցին ոստիկանների և «Տավուշը հանուն հայրենիքի» շարժման անդամների ու կողմնակիցների միջև։ Ոստիկանությունը լուսաձայնային նռնակներ կիրառեց, ինչի հետևանքով 101 անձ վնասվածք ստացավ, այդ թվում` ոստիկաններ։
Նույն օրը ՀՀ քննչական կոմիտեն հայտնեց, որ քրեական վարույթ է նախաձեռնվել ՀՀ քրեական օրենսգրքի 327-րդ հոդվածի 1-ին մասի հատկանիշներով (զանգվածային անկարգություններին մասնակցելը)։