ԵՐԵՎԱՆ, 25 հունիսի – Sputnik. ՀՀ արտգործնախարարության շենքի մոտ տեղի ունեցած բախումներից հետո ձերբակալված անձանցից 3-ն այսօր ազատ են արձակվել։ Տեղեկությունը հայտնում է փաստաբան Ռուբեն Մելիքյանը։
«Դատարանի որոշմամբ՝ այսօր դատական նիստերի դահլիճից ազատ են արձակվել քաղբանտարկյալներ Գագիկ Համբարձումյանը, Ժորա Ավետիսյանը, ինչպես նաև տնային քաղկալանավոր Մեսրոպ Եսայանը։ Բոլոր երեքը խուլիգանության մեղադրանքով ձերբակալվել էին հունիսի 4-ին «ԱԳՆ-ի գործով»»,– գրել է նա ֆեյսբուքյան էջում։
Բոլոր երեքի նկատմամբ դատարանը կիրառել է «վարչական հսկողություն» խափանման միջոցը։
Հիշեցնենք` «Տավուշը հանուն հայրենիքի» շարժման առաջնորդ Բագրատ սրբազանը մայիսի 31-ին ՀՀ արտգործնախարարության շենքի մոտ կոչ արեց նախարար Արարատ Միրզոյանին իջնել ներքև ու ժողովրդի առաջ պատասխանել Ադրբեջանի նախագահ Իլհամ Ալիևի ու Թուրքիայի նախագահ Ռեջեբ Թայիբ Էրդողանի` վերջին օրերին հնչեցրած հայտարարություններին։ ԱԳՆ-ից պատասխանել էին, որ չեն կարող ընդունել շարժման ներկայացուցիչներին։ Որոշ ժամանակ անց իրավիճակն ԱԳՆ–ի մոտ լարվեց, բախումներ սկսվեցին ոստիկանների ու ակցիայի մասնակիցների միջև։ Իրավապահները սկսեցին բերման ենթարկել մարդկանց։
ՀՀ ներքին գործերի նախարարությունն ավելի ուշ հայտնեց, որ ակցիայի 29 մասնակից է բերման ենթարկվել։ Հունիսի 3-ին հայտնի դարձավ, որ ձերբակալվածներից 27–ն ազատ են արձակվել։
Ակցիայի մասնակիցներից 5–ի նկատմամբ քրեական հետապնդում է հարուցվել խուլիգանության հոդվածով։