Վահան Քերոբյանի քառամսյա տնային կալանքի ժամկետը սպառվել է

ԵՐԵՎԱՆ, 17 հունիսի – Sputnik. ՀՀ էկոնոմիկային նախկին նախարար Վահան Քերոբյանի քառամսյա տնային կալանքի ժամկետը սպառվել է։ Այս մասին Քերոբյանը գրել է սոցցանցի իր էջում և լուսանկար հրապարակել։

Քերոբյանը խոստացել է, որ կհասնի ինչպես իր, այնպես էլ մյուս բոլոր մեղադրյալների արդարացմանը, որոնց իրավապահ համակարգը ճկել է ու պարտադրել «զղջման» հիմքով քրեական հետապնդման դադարեցման սցենարին։ Նրա խոսքով` դեռևս նախորդ շաբաթ իրենք բողոքներ ենք ներկայացրել դատախազության կայացրած այդ ապօրինի որոշումների դեմ։

ՀՀ էկոնոմիկային նախկին նախարարը նաև շեշտել է, որ ինքն այս փորձությունից ավելի ուժեղ, ավելի տոկուն ու նոր գիտելիքներով հարստացած է դուրս եկել։ Կարդացել է Աստվածաշնչի զգալի մասը, ընթերցել և վերընթերցել մի քանի այլ գեղարվեստական և մասնագիտական գրքեր։ Յուրացրել Սթենֆորդի համալսարանի Էնդրյու Ընգի մեքենայական ուսուցման խորացված կուրսը, Միչիգանի համալսարանի Python-ի կուրսերը, ուսումնասիրել է արհեստական բանականության և հարակից ոլորտների հետ կապված հետաքրքիր հետազոտություններ։

«Ակամա, մանրամասն ուսումնասիրեցի նաև քրեական օրենսդրությունը և ընդհանրապես, իրավապահ համակարգի աշխատանքը»,–նշել է նա։

Վահան Քերոբյանն անցնում է կոռուպցիոն չարաշահումների գործով։ Փետրվարի 16-ին նրա նկատմամբ խափանման միջոց ընտրվեց տնային կալանքը` 2 ամիս ժամկետով։ Ապրիլի 13-ին նրա նկատմամբ կիրառված տնային կալանքը երկարաձգվեց ևս 2 ամսով։ Ի սկզբանե գործով 8 մեղադրյալ կար, որոնցից մի մասը էկոնոմիկայի նախարարության աշխատակիցներ էին, իսկ մյուս մասը` մասնավոր սեկտորից։ Քրեական գործը կարճվել է 8 մեղադրյալներից 6-ի նկատմամբ (գործուն զղջալու հիմքով)։