ԵՐԵՎԱՆ, 28 մայիսի – Sputnik. Հայաստանի Հանրապետությունը մարդու պետություն է ու պետք է ծառայի մարդուն։ ՀՀ վարչապետ Նիկոլ Փաշինյանն այս հայտարարությունն արեց Սարդարապատի հուշահամալիրում, որտեղ նա ժամանեց ՀՀ նախագահ Վահագն Խաչատուրյանի և ԱԺ նախագահ Ալեն Սիմոնյանի ուղեկցությամբ։
Նա նշեց, որ Հանրապետության տոնը խորհրդանշում է մեր ժողովրդի 400–ամյա երազանքի, պետականության ստեղծումը, սեփական երկրում բարձրագույն իշխանություն լինելու հանգամանքը, որը մեր հազարամյա պատմության ընթացքում նրան տրվել է առաջին անգամ։
«Հանրապետությունը պետք է կերտվի ժողովրդի, անհատի, քաղաքացու և ոչ թե իրեն վերնախավ համարող մեկուսացած խմբերի երազանքներին ու պատկերացումներին համահունչ, որ չստացվի այնպես` ժողովուրդը գտնվի Հայաստանում, բայց երազի մեկ այլ տեղում, մեկ այլ երկրում ապրելու մասին, ինչպես երկար տարիներ պատահել է մեր հանրապետությունների հետ»,– հայտարարեց ՀՀ վարչապետը։
ՀՀ տոնի առիթով Սարդարապատի հուշահամալրիում տեղի ունեցավ զորահանդես։ Հնչեց ՀՀ օրհներգը, Փաշինյանը ծաղկեպսակ դրեց հուշահամալիրի մոտ։
Հիշեցնենք` մայիսի 28-ին նշվում է Հանրապետության տոնը։ Հայաստանի առաջին հանրապետությունը հռչակվեց 1918 թվականի մայիսի 28-ին ու գոյություն ունեցավ մինչև 1920 թվականը։