ԵՐԵՎԱՆ, 10 հունվարի – Sputnik. Հայաստանում կարագի և ձեթի գները 2023 թվականի դեկտեմբերին 2022 թվականի դեկտեմբերի համեմատ նվազել են 20.6%-ով: Այդ մասին են վկայում ՀՀ վիճակագրական կոմիտեի տվյալները։ Մասնավորապես մարգարինի գինը մեկ տարում նվազել է 23.1%-ով, կարագինը՝ 5.7% - ով:
2022 թվականի ապրիլից ձեթի գնի աճը պահպանվել է 20%–ի և ավելի բարձր մակարդակում, այդ թվում՝ Ուկրաինայում տիրող իրավիճակի պատճառով (որի հետևանքով 2022 թվականի կեսերին նվազեցին արևածաղկի ձեթի մատակարարումները համաշխարհային շուկա)։
Միևնույն ժամանակ համաշխարհային գները տարվա ընթացքում փոքր-ինչ նվազեցինարմավենու և սոյայի յուղի համեմատաբար բարենպաստ մատակարարումների պատճառով: Բայց հաշվի առնելով, որ Հայաստանի մանրածախ առևտրում հիմնականում արևածաղկի ձեթ է սպառվում, այն դեպի վերև էր քաշում ընդհանուր գները։ 2023 թվականին գները հասան գագաթնակետին և սկսեցին աստիճանաբար իջնել։
Հացաբուլկեղենի և հացահատիկի գները նվազել են 8,7%-ով (տարածաշրջանում և աշխարհում ցորենի գները նվազել են շնորհիվ Ռուսաստանում եղած մեծ բերքի, որը սպասվում է նաև 2024 թվականին)։
Կաթնամթերքի և ձվի գները փոքր–ինչ ցածր են նախորդ տարվա համեմատ, քանի որ շուկայում լուրջ ցնցումներ չեն գրանցվել (որոնք ժամանակ առ ժամանակ տեղի են ունենում ձվի շուկայում, մասնավորապես՝ գերարտադրության պատճառով)։ Մսի գները մնացել են նախորդ տարվա մակարդակում (նվազել են մոտ 1%-ով), շաքարավազի և շոկոլադի գները նվազել են մոտ 4%-ով: