ԵՐԵՎԱՆ, 7 դեկտեմբերի – Sputnik. Ռուսական հեռուստաալիքների փակման հարց հիմա չի քննարկվում։ Կառավարության նիստից հետո այս հայտարարությունն արեց ՀՀ բարձր տեխնոլոգիական արդյունաբերության նախարար Ռոբերտ Խաչատրյանը։
Նրա խոսքով՝ ռուսական կողմի հետ խորհրդակցություններ պետք է անցկացվեն, օրն ու ժամը դեռ հստակեցված չէ։
Ավելի վաղ Հայաստանի հեռուստատեսության և ռադիոյի հանձնաժողովը հայտարարել էր, որ հանրապետությունում ռուսական հեռուստաալիքների հեռարձակման մասին պայմանագրի դրույթների խախտումներ է հայտնաբերել։ Լրագրողները հետաքրքրվեցին նախարարից, թե խոսքն ինչ խախտումների մասին է։
«Երբ այստեղ տեղում հանդիպենք, ավելի առարկայական, բովանդակային կխոսենք»,- նշեց նախարարը։
Նա հավելեց, որ ռուսական կողմի հետ խորհրդակցություններն այս տարի են կայանալու Երևանում։ Շեշտեց՝ նախաձեռնողը հայկական կողմն է։ Հանդիպման օրակարգում համաձայնագրի կետերի պահպանումն է։
Նախարարը չցանկացավ մեկնաբանել տարբեր շրջանակների կողմից հնչող` ռուսական ալիքների փակման պահանջը։ Ըստ նրա՝ քանի դեռ խորհրդակցությունները չեն կայացել, ինքը ոչինչ չի կարող ասել։
Հիշեցնենք, որ ՀՀ վարչապետ Նիկոլ Փաշինյանը նոյեմբերի 24-ին քաղաքացիների հետ հարցուպատասխանի ժամանակ անդրադարձել էր ռուսական հեռուստաալիքների թեմային։ Նա նշել էր, որ Հայաստանի և Ռուսաստանի կառավարությունների միջև 2020թ․ դեկտեմբերի 30-ից գործում է զանգվածային հեռահաղորդակցության ոլորտում համագործակցության մասին համաձայնագիրը, որը կարգավորում է ռուսական ալիքների հեռարձակումը Հայաստանում և հայկական հեռուստաալիքներինը ՌԴ–ում։ Համաձայնագրում կա հստակ կարգավորում՝ երկրի ներքին գործերին միջամտելու, երկրում ներքաղաքական իրավիճակն ապակայունացնելու ուղղությամբ ջանքեր չպետք է գործադրվեն։ Փաշինյանը հույս էր հայտնել, որ ռուսական հեռուստաալիքների հետ կապված խնդիրները շուտով կկարգավորվեն։