«Զանգեզուր» կենսոլորտային համալիրում տեղադրված ֆոտոթակարդները կովկասյան ընձառյուծ են որսացել: Տեսագրությունը հրապարակվել է Բնության համաշխարհային հիմնադրամի (WWF) հայաստանյան մասնաճյուղի ֆեյսբուքյան էջում։
«Ընձառյուծներն իրենց կենսամիջավայրի որոշ տեղերում հոտային նշաններ են թողնում հնարավոր մրցակիցներին կամ զուգընկերներին սեփական ներկայության մասին ազդարարելու համար։ ՀՀ պահպանվող տարածքներում կան վայրեր, որտեղ հաճախ այցելում են մեկից ավելի ընձառյուծներ։ Այսպիսով` այս կետերում նրանց միջև «լուռ հաղորդակցություն» է տեղի ունենում»,– նշել է հիմնադրամը։
Տեսագրությունն անտարբեր չի թողել օգտատերերին։ Ոմանք ենթադրել են, որ կադրերում երևացող ընձառյուծը էգ է, և հնարավոր է` նա սպասում է ձագին:
Հիշեցնենք` 2023 թ. օգոստոսի 15–ին «Խոսրովի անտառ» պետական արգելոցում տեղադրված ֆոտոթակարդները հազվագյուտ տեսարան էին արձանագրել, որում երևում էր, թե ինչպես է զբոսնում ընձառյուծը։
«Զանգեզուր» կենսոլորտային համալիրի «Բողաքար» պետական արգելավայրում ընձառյուծ էր երևացել նաև 2020 թվականի դեկտեմբերին։
Նշենք, որ ընձառյուծն ընդգրկված է ՀՀ կարմիր գրքում և Բնության պահպանության միջազգային միության Կարմիր ցուցակում։