ԵՐԵՎԱՆ, 8 հունիսի - Sputnik. Կարմիր ծով նահանգի իշխանությունները կարգադրել են փակել Հուրգադայի բոլոր լողափերը շնաձկան հարձակման հետևանքով մարդու մահից հետո: Այս մասին ՌԻԱ Նովոստիին հայտնել է իրազեկ աղբյուրը:
Ավելի վաղ Հուրգադայում ՌԴ գլխավոր հյուպատոսությունը հայտնել էր Dream Beach շրջանում Ռուսաստանի քաղաքացու վրա շնաձկան հարձակման մասին, նշելով, որ նա մահացել է։
Ավելի ուշ շնաձուկը բռնվել է։
Վայրի բնության պաշտպանության Արաբական ասոցիացիայի (AFWP) գլխավոր քարտուղար Գամալ Գոմաան ՌԻԱ Նովոստիին ասել էր, որ շնաձկան համար մարդու վրա հարձակումը բնական վարք չէ, Հուրգադայում միջադեպերի պատճառ կարող էր դառնալ զբոսաշրջային նավակներից ձկներին կերակրելու սովորությունը:
2010 թվականի դեկտեմբերին Շարմ Էլ Շեյխ առողջարանային քաղաքի շրջանում հանգստացողների վրա շնաձկների հինգ հարձակում է տեղի ունեցել։ Մահացել է Գերմանիայի մեկ քաղաքացի, տուժել է չորս զբոսաշրջիկ՝ երեք ռուս և Ուկրաինայի մեկ բնակիչ։ Այդ հարձակումների պատճառով իշխանությունները ստիպված են եղել որոշ ժամանակով փակել հանգստավայրի լողափերը։