ՌԴ դեսպանն այցելել է Սարդարապատի հուշահամալիր

ԵՐԵՎԱՆ, 28 մայիսի – Sputnik. Հայաստանում Ռուսաստանի Դաշնության դեսպան Սերգեյ Կոպիկինը Հանրապետության տոնի առիթով այսօր այցելել է Սարդարապատի հուշահամալիր։ Տեղեկությունը հայտնում է ՌԴ դեսպանության մամուլի ծառայությունը։

Դեսպանի հետ միասին հուշահամալիր է այցելել դեսպանության ռազմական և ռազմաօդային կցորդ Ռոման Պոլյանովսկին։ Դիվանագետները մասնակցել են հանդիսավոր միջոցառմանը, որը նվիրված էր Հայաստանի առաջին հանրապետության հռչակման 105-րդ տարեդարձին:

«Շնորհավորում ենք Հայաստանի Հանրապետության քաղաքացիներին պետական տոնի կապակցությամբ»,– նշված է դեսպանության տարածած հաղորդագրության մեջ։

Հիշեցնենք, որ Հանրապետության տոնի առիթով Սարդարապատի հուշահամալիրի մոտ այսօր զորահանդես և տոնական երթ է անցկացվել, որին մասնակցել են ՀՀ վարչապետ Նիկոլ Փաշինյանը, նախագահ Վահագն Խաչատուրյանը, Ազգային ժողովի նախագահ Ալեն Սիմոնյանը, գործադիր և օրենսդիր իշխանությունների այլ ներկայացուցիչներ, տարբեր երկրների դիվանագետներ, զինվորականներ։

Հիշեցնենք, որ 1918թ.–ին, ցեղասպանության ենթարկված հայ ժողովուրդը Սարդարապատում կարողացավ կենաց ու մահու կռիվ մղել թուրքական մեծաքանակ զորքի դեմ և հաղթանակ տանել` դրանով ապացուցելով իր գոյության իրավունքը։ Սարդարապատի ճակատամարտը տեղի ունեցավ 1918 թ.–ի մայիս 26–ին, իսկ 2 օր անց` մայիսի 28–ին, հռչակվեց Հայաստանի 1–ին Հանրապետությունը։