ԵՐԵՎԱՆ, 25 ապրիլի – Sputnik. «Բարգավաճ Հայաստան» կուսակցության նախագահ Գագիկ Ծառուկյանը մերժել է քրեական հետապնդումը վաղեմության ժամկետներն անցած լինելու հիմքով դադարեցնելու առաջարկից։ Տեղեկությունը հայտնում է փաստաբան Էմին Խաչատրյանը։
ՀՀ գլխավոր դատախազությունն այսօր տեղեկացրել էր, որ ԱԱԾ քննչական գլխավոր վարչությունում քննված քրեական վարույթով հիմնավորվել է` Գագիկ Ծառուկյանը և «Մուլտի գրուպ կոնցեռն» ՍՊԸ-ի տնօրեն Սեդրակ Առուստամյանը 2017 թվականի ապրիլի 2-ի ընտրությունների ժամանակ կաշառք են տվել ընտրողներին։ Մեղադրական եզրակացությունը վարույթի նյութերի հետ հանձնվել է Հակակոռուպցիոն դատարան:
«Դեռևս նախաքննության փուլում քրեական վարույթն իրականացնող մարմինը Գագիկ Ծառուկյանին առաջարկել է դադարեցնել քրեական հետապնդումը՝ վաղեմության ժամկետներն անցած լինելու հիմքով, սակայն Գագիկ Ծառուկյանն առարկել է այդ հիմքով քրեական հետապնդումը դադարեցնելու դեմ, պնդել է, որ հանրային քրեական հետապնդում հարուցելու մասին որոշման մեջ նկարագրված ենթադրյալ հանցավոր արարքը չի կատարել և միջնորդել է քրեական հետապնդումը դադարեցնել՝ մեղսագրվող արարքը չկատարելու հիմքով»,– գրել է փաստաբանը ֆեյսբուքյան էջում:
Նա շեշտել է` Գագիկ Ծառուկյանի պաշտպանական խումբը բազմիցս հանդես է եկել հայտարարությամբ, որ նա առնչություն չունի իրեն մեղսագրված ենթադրյալ հանցավոր արարքի կատարմանը։
«Քրեական վարույթով ձեռք չի բերվել գեթ մեկ փաստական տվյալ, որը կհաստատի, որ Գագիկ Ծառուկյանն առհասարակ առնչություն ունի ՀՀ ԱԺ 2017 թ–ի ապրիլի 2-ի ընտրություններին մասնակցած կուսակցությունների դաշինքի և դրա կողմից առաջադրված թեկնածուի օգտին քվեարկելու համար ընտրողներին կաշառք տալուն»,– նշել է Խաչատրյանը։
Այժմ, երբ քրեական գործն ուղարկվել է դատարան, փաստաբանները համոզված են, որ հրապարակային դատական լսումների ընթացքում պաշտպանության խմբի պնդումները հասու կդառնան նաև հանրության լայն շրջանակներին և կհերքվի Գագիկ Ծառուկյանի կապն իրեն մեղսագրված ենթադրյալ հանցավոր արարքի կատարման հետ: