ԵՐԵՎԱՆ, 4 ապրիլի – Sputnik. ՀՀ արտաքին գործերի նախկին նախարար Զոհրաբ Մնացականյանը եկել է Ազգային ժողով։ Նա մասնակցում է 44-օրյա պատերազմի հանգամանքներն ուսումնասիրող ԱԺ քննիչ հանձաժողովի նիստին: Այս մասին հայտնում է խորհրդարանում գտնվող Sputnik Արմենիայի թղթակիցը։
Նիստը դռնփակ է։ Մնացականյանը հրավիրվել է ԱԺ քննիչ հանձնաժողովի նիստին, որպեսզի որոշ հարցերի պատասխանի։
Հավելենք, որ նախորդ նիստի ժամանակ` մարտի 16-ին, ԱԺ էր կանչվել Զինված ուժերի գլխավոր շտաբի նախկին պետ Օնիկ Գասպարյանը։
Մինչ օրս նիստին չեն ներկայացել ԶՈւ գլխավոր շտաբի պետի նախկին տեղակալ Տիրան Խաչատրյանը, ՀՀ ԱԳ նախկին նախարար Վարդան Օսկանյանը, Արցախի ՊԲ նախկին հրամանատար Ջալալ Հարությունյանը, ԶՈւ ԳՇ նախկին պետ Մովսես Հակոբյանը։
Հիշեցնենք` 2020 թվականի սեպտեմբերի 27-ին սանձազերծված ռազմական գործողությունների հանգամանքների ուսումնասիրման նպատակով քննիչ հանձնաժողովը ստեղծվել է 10.02.2022 թվականին։ Օրենքով ժամանակավոր հանձնաժողովի գործունեության ժամկետը 6 ամիս է։
Հանձնաժողովի գործունեության ժամկետը մեկ անգամ արդեն երկարաձգվել է։