ԵՐԵՎԱՆ, 20 հունվարի – Sputnik. ԱՄՆ պաշտպանության նախարար Լլոյդ Օսթինը հայտարարել է, որ Ուկրաինայի դաշնակիցները Կիևին զենք մատակարարելու վերաբերյալ նոր պայմանավորվածություն են ձեռք բերել։ Ինչպես հայտնում է ՌԻԱ Նովոստին, Օսթինն այդ մասին հայտարարել է Ռամշտայն ռազմակայանում (Գերմանիա) կոնտակտային խմբի հանդիպումից հետո կազմակերպված ասուլիսի ժամանակ։
«Այս կարևոր նոր պայմանավորվածությունները ցույց են տալիս Ուկրաինային օգնելու մեր դաշնակիցների և գործընկերների շարունակական ձգտումը»,– ասել է նա։
Պենտագոնի ղեկավարը մատնանշել է Շվեդիայի մատակարարած հետևակի 90 մարտական մեքենաներն ու «Archer» հաուբիցների առաջիկա մատակարարումները, Դանիայի կողմից 19 հաուբիցների մատակարարումը, Լատվիայի տրամադրած «Stigner» համակարգերը, ուղղաթիռներն ու այլ սարքավորումները, ինչպես նաև Էստոնիայից 155-մմ հաուբիցների տեղափոխումը։
Ռուսաստանն ավելի վաղ ՆԱՏՕ-ի երկրներին բողոքի նոտա էր հղել Ուկրաինային ռազմամթերք մատակարարելու համար։ ՌԴ ԱԳ նախարար Սերգեյ Լավրովը նշել էր, որ ցանկացած բեռ, որն Ուկրաինայի համար ռազմամթերք կպարունակի, Ռուսաստանի համար օրինական թիրախ կդառնա։ ՌԴ արտաքին քաղաքական գերատեսչությունում հայտարարել էին, որ ՆԱՏՕ-ի երկրները, Ուկրաինային ռազմամթերք մատակարարելով, կրակի հետ են խաղում։ ՌԴ նախագահի մամուլի խոսնակ Դմիտրի Պեսկովն ընդգծել էր, որ Արևմուտքի կողմից Ուկրաինային զենք տրամադրելը չի նպաստում ռուս-ուկրաինական բանակցությունների հաջողությանը և բացասական ազդեցություն է թողնում։