Հերոսածին մայրերը մահին հաղթում են` նոր կյանք պարգևելով։ Առողջապահության նախարարությունը տեսանյութ է հրապարկել 44-օրյա պատերազմում միակ զավակին՝ Նորայրին կորցրած Վարդանյանների ընտանիքից, որոնց կյանքում համալրում է եղել։ Նրանք միանգամից զույգ երեխա են ունեցել` տղա և աղջիկ։
Մայրը` Լիլիթը, խոստովանում է, որ արտամարմնային բեղմնավորման գնացել է՝ առանձապես հույս չունենալով, որ կստացվի կրկին մայրանալ։
Ծնողները նորածինների դիմագծերում փորձում են նմանություն գտնել իրենց առաջնեկի հետ, սակայն հավելում են, որ Նորիկի բացը երբեք ոչ ոք չի կարող լրացնել։
Նշենք, որ երեխաները լույս աշխարհ են եկել «Անպտղության հաղթահարման» ծրագրի օգնությամբ։
«2022 թվականի հոկտեմբերի 31-ի դրությամբ՝ «Անպտղության հաղթահարման» ծրագրի օգնությամբ 44-օրյա պատերազմում որդի կորցրած 25 ընտանիքում 26 երեխա է ծնվել, մի քանի տասնյակ ընտանիքում էլ երեխայի ծնունդին են սպասում»,– հայտնում է ԱՆ–ն։
Նախարարությունը հիշեցնում է, որ պատերազմում որդի կորցրած ծնողները կարող են արհեստական սերմնավորմամբ և արտամարմանային բեղմանավորմամբ երեխաներ ունենալ։ Ֆինանսական ծախսերը հոգում է պետությունը։
ԱՆ–ն նաև հայտնում է, որ «Անպտղության հաղթահարման» ծրագրով ծնված առաջին երեխան 9 ամսական է։