Հայաստանում արևմտյան ազդեցության տարածման համատեքստում Իրանի հիմնական մտահոգությունն առնչվում է այն հարցին, որ այդ ազդեցությունը չվերածվի հակաիրանական գործողությունների։ Sputnik Արմենիայի հետ զրույցում նման կարծիք հայտնեց իրանագետ Գարիկ Միսակյանը։
«Եթե Արևմուտքի ներկայությունը Հայաստանում դառնա իրական նաև ռեալպոլիտիկի տեսանկյունից, ապա իրանական կողմը կարող է քաղաքականության փոփոխություն իրականացնել Հայաստանի նկատմամբ»,–նշեց մեր զրուցակիցը։
Միսակյանը հիշեցրեց, որ արտգործնախարար Հոսեյն Աբդոլլահիանը Հայաստան կատարած այցի ընթացքում արտահայտեց Իրանի մտահոգությունները` նշելով, որ Արևմուտքի ներկայությունը Հայաստանում ռազմական, դիտորդական կամ խաղաղապահական ձևաչափով ընդունելի չէ Իրանի համար։
Իրանագետի փոխանցմամբ` Իրանի վերլուծական և փորձագիտական շրջանակներում տարածված է այն տեսակետը, որ Հայաստանի համար բավական դժվար կլինի փոխել արտաքին քաղաքական վեկտորն ու «ազատվել» ռուսական ազդեցությունից, քանի որ այդ ազդեցությունը չափազանց մեծ է նաև ռազմական ներկայության առումով։
«Ներկա փուլում Իրանը փորձում է իր դիրքերն ամրապնդել մեր երկրում, իսկ Սյունիքում հյուպատոսության բացումը նաև կանխարգելիչ բնույթ ունի։ Իրանական կողմը փորձում է այն դաշնակցի դերը կատարել, որի կարիքն ունի մեր հանրությունը, և դրա ցուցիչներն են Հայաստանում Իրանի դեսպանի և նորանշանակ գլխավոր հյուպատոսի հայտարարությունները»,–ասաց Միսակյանը։
Հիշեցնենք` Իրանի ԱԳ նախարար Հոսեյն Ամիր Աբդոլլահիանը Հայաստան էր ժամանել հոկտեմբերի 20–ին։ Հոկտեմբերի 21-ին ՀՀ ԱԳ նախարար Արարատ Միրզոյանը և Աբդոլլահիանը ներկա են եղել Կապանում ԻԻՀ գլխավոր հյուպատոսության բացման հանդիսավոր արարողությանը։