ԵՐԵՎԱՆ, 9 հոկտեմբերի - Sputnik. Թուրքիայի հատուկ ծառայությունները հայտարարել են քուրդ գրոհային Օքքեշ Դևերիի չեզոքացման մասին։ Այս մասին հայտնում է Anadolu գործակալությունը։
«Ազգային հետախուզական կազմակերպության (MIT) ջանքերով Իրաքի հյուսիսում գտնվող Գարա շրջանում չեզոքացվել է ՔԱԿ-ի հատուկ վտանգավոր գրոհային Օքքեշ Դևերին` «Քենդալ Փիրսուս» մականունով։ Անվտանգության ուժերի աղբյուրները հայտնել են, որ Դևերին բժշկական համալսարանի ուսանող եղած ժամանակ անդամակցել է ահաբեկչական կազմակերպությանը, համալսարանը լքել է 2010 թվականին և տեղափոխվել Քանդիլ, մասնակցել է Զապ, Մեթինա և Հաքուրք շրջաններում ահաբեկչական գործունեությանը»,- հաղորդում է գործակալությունը:
Հաղորդվում է, որ 2021 թվականին նա նշանակվել է ՔԱԿ շարքերում բժշկական հարցերով պատասխանատու Գարայի շրջանում։
Նշվում է, որ Դևերին սպանվել է Գարայի շրջանում MIT-ի հատուկ գործողության արդյունքում այլ «ահաբեկիչների» հետ միասին, որոնց թվում է նաև նրա մերձավոր Քայհան Քարթալը՝ «Քեմալ Փիր» կոդային անունով:
Թուրքիայում Քրդիստանի Աշխատավորական կուսակցության հետ զինված հակամարտությունը սկսվել է 1984-ին և վերսկսվել է 2015-ին: Իրաքի հյուսիսում տեղակայված են ՔԱԿ բազաները, որոնց դեմ Թուրքիայի զինված ուժերը օդային և ցամաքային գործողություններ են իրականացնում։ Մոսուլից դեպի հյուսիս-արևելք գտնվող Զլիքան ճամբարում թուրք զինվորականների ներկայությունը վաղուց արդեն վեճեր է առաջացնում Բաղդադի և Անկարայի միջև. վերջինս այդ ներկայությունն արդարացնում է Թուրքիայում արգելված ՔԱԿ-ի դեմ պայքարի անհրաժեշտությամբ: