ԵՐԵՎԱՆ, 25 մայիսի – Sputnik. ՀՀ ԱԺ «Պատիվ ունեմ» խմբակցության պատգամավոր, Մարդու իրավունքների պաշտպանության և հանրային հարցերի մշտական հանձնաժողովի նախագահ Թագուհի Թովմասյանը Հայաստանում ԵՄ պատվիրակության ղեկավար, դեսպան Անդրեա Վիկտորինի հրավերով հանդիպել է ԵՄ անդամ պետությունների դեսպանների հետ։
Տեղեկությունը նա հայտնել է «Ֆեյսբուքի» իր էջում և հավելել, որ հանդիպմանը բարձրաձայնել է խաղաղ բողոքի ակցիաների իրականացման ողջ ընթացքում մարդու իրավունքների խախտումներին վերաբերող խնդրահարույց հարցեր։
«Խոսել եմ խաղաղ անհնազանդության ակցիա իրականացնող մեր քաղաքացիների նկատմամբ ՀՀ ոստիկանական ուժերի կողմից գործադրվող անհամաչափ ուժի, լրագրողների նկատմամբ գործադրվող բռնությունների դեպքերի, պատգամավորների բերման ենթարկման և անձեռնմխելիության խախտմանն առնչվող հարցերի մասին»,- նշել է Թովմասյանը։
Հանդիպմանը մասնակցել է նաև ՀՀ Մարդու իրավունքների պաշտպան Քրիստինե Գրիգորյանը:
Նշենք, որ մոտ մեկ ամիս ՀՀ-ում ընթացող ընդդիմության բողոքի ակցիաների ժամանակ ոստիկանությունը երբեմն անհամաչափ, բիրտ ուժ է կիրառում ցուցարարների նկատմամբ։
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության երթեր ու հանրահավաքներ, այլ միջոցառումներ։