Մայիսի 17-ի առավոտից Երևանի փողոցներն անհանգիստ էին։ Ընդդիմությունը կրկին շարունակեց անհնազանդության ակցիաները՝ իշխանության հրաժարականին հասնելու նպատակով։ «Դիմադրություն» շարժման կողմնակիցները փակել էին փողոցներն ու խաչմերուկները՝ փորձելով կաթվածահար անել երթևեկությունը։ Շատ հատվածներում դա նրանց հաջողվում էր։
Այսօրվա բողոքի ակցիաներն աննախադեպ էին ինչպես փակ տրանսպորտային հանգույցների, այնպես էլ ձերբակալվածների թվով։ Ոստիկանությունը ջանասիրաբար էր գործում։ 12:30-ի տվյալներով՝ բերման է ենթարկվել 414 մարդ։ «Ռեկորդային» թիվ: Համեմատության համար նշենք, որ մայիսի 2-ին տեղի ունեցած նույն ծավալի բողոքի ակցիաների ժամանակ ձերբակալվել է 244 մարդ։ Իսկ 2018 թվականի ապրիլի 23-ին՝ Նիկոլ Փաշինյանի գլխավորած բողոքի շարժման ամենաթեժ օրը՝ 363 մարդ։
Բողոքի շարժման առաջնորդներն ասել են, որ ձերբակալությունների նման մեծ թիվը ոստիկանական տեղամասերում կոլապսի է հանգեցրել:
Հիշեցնենք` Հայաստանում բողոքի ալիք բարձրացավ ՀՀ վարչապետ Նիկոլ Փաշինյանի` Արցախի վերաբերյալ հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Մայիսի 2-ից սկսած` ամեն օր Երևանում կազմակերպվում են անհնազանդության ակցիաներ, երթեր ու հանրահավաքներ։