ԵՐԵՎԱՆ, 13 մայիսի – Sputnik. Հայաստանում ստացած գիտական աստիճանները կճանաչվեն ԵԱՏՄ անդամ երկրների կողմից։
Այս կարգավորումը նախատեսված է «Եվրասիական տնտեսական միության անդամ պետություններում գիտական աստիճանների վերաբերյալ փաստաթղթերի փոխադարձ ճանաչման մասին» համաձայնագրով, որի ստորագրմանն այսօր հավանություն է տվել ՀՀ կառավարությունը։
Համաձայնագրի տորագրումը նախատեսվում է իրականացնել մինչև 2022 թվականի դեկտեմբերի 31-ը, իսկ դրանով նախատեսված ներպետական ընթացակարգերը` մինչև 2025 թ–ը։
Համաձայնագրի նպատակն է գիտական աստիճանների վերաբերյալ փաստաթղթերի համապատասխանության ճանաչման միջոցով վերացնել աշխատանքային միգրացիայի ոլորտում բացառումներն ու սահմանափակումները։
«Սույն համաձայնագրով կկարգավորվի գիտական աստիճանների վերաբերյալ փաստաթղթերի փոխադարձ ճանաչումը՝ աշխատանքի տեղավորման պետությունում աշխատանքային միգրացիայի ոլորտում մասնագիտական գործունեության իրականացման հասանելիությունն այդ փաստաթղթերն ունեցող անձանց համար ապահովելու նպատակով»,– ասվում է որոշման նախագծում։
Համաձայագրին միանալով` Հայաստանը պարտավորվում է փոխադարձաբար ճանաչել նաև փաստաթուղթը ստորագրած ԵԱՏՄ անդամ այլ երկրների գիտական կոչումները իր տարածքում։