ԵՐԵՎԱՆ, 9 մայիսի – Sputnik. Հայաստանի քննչական կոմիտեի ղեկավար Արգիշտի Քյարամյանը պատասխանեց 44-օրյա պատերազմի մասին ՀՀ վարչապետ Նիկոլ Փաշինյանի դեմ քրեական գործ հարուցելու և նրան պատասխանատվության ենթարկելու` զոհվածների ծնողների բողոքի վերաբերյալ հարցին։
«Հաղթանակ» զբոսայգում լրագրողների հետ զրույցում Քյարամյանն ասաց, որ ՀՀ քննչական կոմիտեն գործն ընդունել է վարույթ, և ՔԿ գլխավոր քննչական վարչությունը այժմ ծանոթանում է նյութերին։
«Գործին ծանոթանալուն պես կսկսենք նախաքննության գործընթացը։ Հիմա ոչ մի նորություն չեմ կարող հայտնել»,- ասաց Քյարամյանը։
Լրագրողի՝ Քննչական կոմիտեի ղեկավարին ուղղած հարցին, թե արդյոք պատերազմի մասին հնչեցրած սկանդալային հայտարարությանները բավարար չե՞ն վարչապետին հարցաքննության կանչելու համար, Քյարամյանը հայտարարեց, որ գործը պետք է բազմակողմանի քննվի։
Նշենք, որ ապրիլի 13-ին Նիկոլ Փաշինյանը խորհրդարանի ամբիոնից հայտարարեց, թե կարող էր Ադրբեջանին Արցախի տարածքները հանձնել առանց ռազմական գործողությունների, սակայն հրաժարվելով դա անել, մեղավոր է դարձել հազարավոր մարդկանց մահվան մեջ։
«Որպես իրավաբան կարող եմ ասել, որ գործը պետք է բազմակողմանի, օբյեկտիվ և լրիվ քննվի։ Նախաքննության ընթացքում անհրաժեշտ է պարզել առկա բոլոր հարցերը»,- ասաց Քյարամյանը։
Հիշեցնենք, որ 2022 թվականի ապրիլի 18-ին զոհված զինծառայողների ծնողները դիմել են Հայաստանի գլխավոր դատախազություն՝ Փաշինյանի հայտարարությունների առնչությամբ քրեական գործ հարուցելու և հետաքննություն սկսելու պահանջով։ Ապրիլի 25-ից նրանք պահանջում են իրենց բողոքի պատասխանը՝ բողոքի ակցիաներ անցկացնելով ՀՀ գլխավոր դատախազության շենքի մոտ։
Ավելի ուշ հայտարարություն տարածվեց, որ գործը փոխանցվել է ՀՀ հակակոռուպցիոն կոմիտեին։ Մայիսի 5-ին հայտնի դարձավ, որ նախաքննությունը կվարի Քննչական կոմիտեն։