ԵՐԵՎԱՆ, 6 մայիսի – Sputnik. Մոսկվայի Ալեքսանդրյան այգում Անհայտ զինվորի գերեզմանից վերցված հավերժական կրակը Հայաստան կտեղափոխեն մայիսի 7-ին՝ «Հիշատակի կրակ» հայրենասիրական ակցիայի շրջանակում: Այս մասին Sputnik Արմենիային հայտնել են Երևանում ռուսական տան մամուլի ծառայությունից (Ռոսսոտրուդնիչեստվո)։
«Ռոսիա» ավիաընկերությունը (Աերոֆլոտ խումբ) «Հանուն Ռուսաստանի ժողովրդական ճակատ» համառուսաստանյան հասարակական շարժման հետ է իրականացնում այս ակցիան:
«Ակցիայի նպատակն է հավերժացնել պատմական հիշողությունը, հարգանքի տուրք մատուցել Հայրենական մեծ պատերազմի մասնակիցներին, միավորել սերունդներ և կրակի մասնիկը հասցնել առավելագույն թվով վետերաններին»,- նշել են գերատեսչությունում:
Հավերժական կրակի մի մասնիկը Հայաստան է բերելու «Ժողովրդական» ճակատի նախագծային նախաձեռնությունների վարչության պետ Ելենա Միլտոյի գլխավորած պատվիրակությունը։ Նույն օրը տեղի կունենա «Հիշատակի կրակի» պատիճը «Մայր Հայաստան» ռազմական պատմության թանգարանին հանձնելու արարողությունը:
Նշենք, որ «Հիշողության կրակը» հայրենասիրական ակցիան անցկացվելու է մայիսի 6-9-ը, այս տարի այն միջազգային կարգավիճակ է ստացել՝ մասնակցում է 12 երկիր։ Ակցիան արդեն 6-րդ անգամ է անցկացվում։ 2021 թվականին ակցիային մասնակցել է ավելի քան 900 մարդ, հավերժական կրակի մասնիկներով շուրջ 100 լամպ փոխանցվել է վետերաններին Ռուսաստանի 11 շրջաններում:
Տեղեկացվում է, որ «Հիշողության կրակ» հայրենասիրական արշավի շրջանակում, «Անմար կրակի» մասնիկները կհասցվեն Հայաստան, Ուզբեկստան, Ղազախստան և Ադրբեջան։