ԵՐԵՎԱՆ, 4 մայիսի – Sputnik. Հայաստանի Հանրապետության արժանապատիվ քաղաքացիները որևէ շենք զավթելու կարիք չունեն։ Ի պատասխան ԱԱԾ հայտարարության` իր ֆեյսբուքյան էջում գրել է «Հայաստան» խմբակցության պատգամավոր Քրիստինե Վարդանյանը։
ԱԱԾ-ն հայտարարություն է տարածել` ասելով, թե հավաստի տվյալներ են ստացել, որ Երևանում անցկացվող հավաքի կազմակերպիչները մտադիր են այսօր անցկացվող ԱԺ հերթական նստաշրջանի ընթացքում սադրանքների միջոցով հրահրել հակաօրինական գործողություններ և դրդել հավաքի մասնակիցներին զավթել ԱԺ շենքը։
«Որևէ շենք զավթելու կարիք չունենք մի պարզ պատճառով` իշխանությունն այլևս այդ շենքերում չէ, այն Հայաստանի փողոցներում, հայ մարդկանց ձեռքին է»,- գրել է Վարդանյանը։
Նրա խոսքով` մնում է միայն համբերատարությամբ, վճռականությամբ և առանց սադրանքների տրվելու, դե յուրե ևս արձանագրել դե ֆակտո արձանագրված այս իրողությունը։
Հիշեցնենք, որ ոստիկանությունը ևս նույնաբովանդակ հայտարարություն էր տարածել։