ԵՐԵՎԱՆ, 2 մայիսի - Sputnik. Այսօր առավոտից 9։40-ի դրությամբ Երևան քաղաքի ոստիկանության բաժիններ բերման են ենթարկվել անհնազանդության ակցիաների 125 մասնակիցներ։ Այս մասին Sputnik Արմենիային հայտնեցին ՀՀ ոստիկանության լրատվական ծառայությունից։
Բերման ենթարկելու հիմքը ՀՀ վարչական իրավախախտումների օրենսգրքի 182 հոդվածն է` ոստիկանի օրինական պահանջին չենթարկվելը։
Հիշեցնենք, այսօր վաղ առավոտից Երևանի կենտրոնում անհնազանդության ակցիաներ են իրականացվում՝ քաղաքացիները փակում են փողոցները։ Ոստիկաններն ուժի կիրառմամբ ու բերման ենթարկելու միջոցով փորձում են վերականգնել երթևեկությունը։
Չնայած դրան, անհնազանդության ակցիաները շարունակվում են։ Այս պահին իրավիճակը լարված է մնում Գնունի-Ալեք Մանուկյան, Խորենացի-Նար Դոս փողոցների խաչմերուկներում։
Մայիսի 1-ին Երևանի Ֆրանսիայի հրապարակում մեկնարկեց ընդդիմության բազմահազարանոց հանրահավաքը։ Մասնակիցները վրաններ ու բարիկադներ տեղադրեցին, Իշխան Սաղաթելյանը հայտարարեց, որ մայիսի 2-ից սկսում են անհնազանդության ակցիաներ՝ փակելով փողոցները։
Բողոքի ակցիաներն ու երթերը մայրաքաղաքում սկսվել են ՀՀ վարչապետ Նիկոլ Փաշինյանի` Արցախի վերաբերյալ ԱԺ-ում ապրիլի 13-ի հայտարարությունից հետո։
Ապրիլի 22-ին ԱԺ փոխխոսնակ, «Հայաստան» խմբակցության անդամ Իշխան Սաղաթելյանը հայտարարեց վարչապետ Նիկոլ Փաշինյանին և նրա թիմին իշխանությունից հեռացնելու փողոցային պայքարի մեկնարկի մասին։
«Դիմադրություն» շարժման անդամները նաև Հայաստանի 4 տարբեր մարզերից քայլերթեր սկսեցին դեպի Երևան։ Առաջին երթը մեկնարկեց ապրիլի 25-ին` Տավուշի մարզի Իջևան քաղաքից, հաջորդը` Արարատի մարզի Տիգրանաշեն գյուղից, նույն օրը երթ մեկնարկեց նաև Արագածոտնի մարզի Ապարան քաղաքից։ Վերջին՝ 4-րդ երթը մեկնարկեց Արմավիրի մարզի Սարդարապատ գյուղից։