ԵՐԵՎԱՆ, 8 փետրվարի – Sputnik․ Երևանի ավագանու այսօրվա նիստում ընտրվեցին քաղաքապետի 3 տեղակալները` Ստեփան Մաչյանը, Սուրեն Գրիգորյանը և Գևորգ Սիմոնյանը։
«Պարոն Մաչյանի հետ երկար տարիներ աշխատել եմ բանկային համակարգում։ Նա այն ինտելեկտուալ անձանցից է, որը կարողացել է բանկային համակարգում մի մեծ ոլորտ կոորդինացնել` իրականացնելով վերլուծական մեծ աշխատանք։ Մաչյանին առաջարկելու եմ, որ կոորդինացնի քաղաքաշինական բլոկը »,-ասաց Երևանի քաղաքապետ Հրաչյա Սարգսյանը։
Որոշումն ընդունվեց քվեարկությամբ։ Ավագանու անդամներից 50-ը կողմ էին, 1–ը` ձեռնպահ։
Մինչ այս Մաչյանը զբաղեցնում էր «Ճանապարհային դեպարտամենտ» հիմնադրամի գործադիր տնօրենի պաշտոնը։
Երևանի քաղաքապետի մյուս տեղակալը կլինի Սուրեն Գրիգորյանը։
«Պարոն Գրիգորյանը նույնպես աշխատանքային փորձ ունի, և պատկերացնում ենք, որ նա կկոորդինացնի իրավական, առևտրի և գովազդի ոլորտները»,-ասաց Երևանի քաղաքապետը` նշելով, որ առևտրի և գովազդի ոլորտները տարիներ շարունակ բարձիթողի վիճակում են եղել։
Գրիգորյանը 2014-2019 թթ աշխատել է մասնավոր ոլորտում որպես իրավաբան , 2019 թվականի հունվարից մինչև 2021 թվականի մարտը եղել է ՀՀ ԱԺ «Իմ քայլը» խմբակցության պատգամավոր, իսկ 2021 թվականի ապրիլից մինչև դեկտեմբերի զբաղեցրել է ՀՀ արդարադատության նախարարի տեղակալի պաշտոնը։
Ավելի վաղ հայտնել էինք, որ Երևանի քաղաքապետի տեղակալ է նշանակվել ՀՀ առողջապահության նախարարի տեղակալ Գևորգ Սիմոնյանը, որը համակարգելու է առողջապահության և սպորտի ոլորտը։
Հիշեցնենք՝ ավագանու տարեվերջյան նիստում քաղաքապետի առաջին տեղակալ նշանակվեց իշխող «Իմ քայլը» խմբակցության քարտուղար Լևոն Հովհաննիսյանը: Նա մինչ այդ զբաղեցնում էր ավագանու ֆինանսավարկային հանձնաժողովի նախագահի պաշտոնը։
Փոխքաղաքապետներ Սերգեյ Հարությունյանը, Սերգեյ Ներսեսյանը, Գայանե Մելքոմ Մելքոմյանը Հրաչյա Սարգսյանի՝ քաղաքապետ ընտրվելուց հետո աշխատանքից ազատվելու դիմումներ գրեցին։