ԵՐԵՎԱՆ, 29 հունվարի – Sputnik. Ղազախստանի նախագահ Կասիմ-Ժոմարտ Տոկաևը «Խաբար-24»-ին տված հարցազրույցում հայտարարել է, որ ՀԱՊԿ խաղաղապահների ժամանումից առաջ Ռուսաստանի նախագահ Վլադիմիր Պուտինի հետ որևէ նախապայման չի եղել:
«Ինչ վերաբերում է այն շշուկներին, թե մենք պարտք ենք մնացել և այլն... Ես ամենայն պատասխանատվությամբ հայտարարում եմ, որ Վլադիմիր Պուտինի հետ զրույցներից ոչ մեկը (իսկ այդ զրույցները քիչ չեն եղել) չի եղել, բնականաբար, այն մասին, որ մենք հետո հաշիվ կվճարենք։ Կրեմլի կողմից ոչ մի նախապայման ևս չի եղել։ Ի վերջո, Ղազախստանի համար Ռուսաստանը դաշնակից պետություն է»,-նշել է Տոկաևը։
Նրա խոսքով՝ ՀԱՊԿ խաղաղապահ զորակազմի ներգրավումը եղել է կազմակերպության փաստաթղթերին համապատասխան, միանգամայն օրինական հիմքով:
Ավելին, Ղազախստանում խաղաղապահները ոչ մի կրակոց չեն արձակել։
«Ամենասկզբից էլ պայմանավորվածություն կար, որ այդ զորակազմը կատարելու է ապահովման գործառույթներ, այսինքն՝ պահպանելու է ռազմավարական օբյեկտները»,-ասել է Տոկաևը։
Հիշեցնենք` Ղազախստանում բողոքի զանգվածային ցույցեր էին սկսվել 2022 թվականի հունվարի առաջին օրերին։ Հունվարի 4–ին և 5-ին Ալմաթիում բախումներ էին տեղի ունեցել ցուցարարների և ուժայինների միջև։
Հունվարի 5-ին Ղազախստանի նախագահ Կասիմ Ժոմարտ-Տոկաևը ստորագրել էր երկրի կառավարության հրաժարականի մասին հրամանագիրը։
Նույն օրը Տոկաևը երկրում երկշաբաթյա արտակարգ դրություն էր մտցրել։ Նա օգնության համար դիմել էր Հավաքական անվտանգության պայմանագրի կազմակերպությանը, որն այս տարի նախագահում է Հայաստանը։
ՀԱՊԿ-ը իրավիճակը կայունացնելու համար խաղաղապահ զորախումբ էր ուղարկել Ղազախստան, որոնց թվում 100 զինծառայող կար Հայաստանից։
ՀԱՊԿ խաղաղապահ զորակազմի դուրսբերումը Ղազախստանից սկսվել էր հունվարի 13-ին և ավարտվեց հունվարի 19–ին:
ՀԱՊԿ-ում ընդգրկված են Հայաստանը, Բելառուսը, Ղազախստանը, Ղրղզստանը, Ռուսաստանը, Տաջիկստանը: