Ներուժը կա. ՌԴ Գործարար կանանց ասոցիացիայի անդամները Գյումրիում էին

ԵՐԵՎԱՆ, 18 հունվարի – Sputnik. Հայ-ռուսական բիզնես համաժողովի շրջանակում Հայաստան ժամանած ՌԴ Գործարար կանանց միջտարածաշրջանային ասոցիացիայի անդամները հունվարի 18-ին այցելեցին Գյումրի` ծանոթանալու քաղաքի բիզնես ներուժին։

Ռուս գործընկերների հետ հանդիպմանը ներկա էին Գյումրիում գործող, ճանաչում ձեռք բերած և նորաստեղծ ընկերությունների ներկայացուցիչները: Ներկայացնելով Հայաստան կատարած այցի նպատակները՝ ասոցիացիայի նախագահ Օլգա Խոդակովսկայան տեղեկացրեց, որ Հայաստան են եկել ճանաչողական նպատակով:

«Ասոցիացիան ՌԴ 36 քաղաքներում մասնաճյուղեր ունի: Երեկ մենք համագործակցության հուշագիր կնքեցինք նաև Հայաստանի հետ, որը մեզ հետ համագործակցող հինգերորդ երկիրն է»,-ասաց նա։

Նրա խոսքով` չնայած տարիների համագործակցությանը` ռուսական բիզնեսը դեռ հստակ պատկերացում չունի հայաստանյան ներդրումային հնարավորությունների մասին:

«Մինչ այստեղ գալը Հայաստանի բիզնես ներուժը մեզ համար մաքուր էջ էր, հիմա արդեն ավելի տեղեկացված ենք»,-նշեց Խոդակովսկայան։

Ասոցիացիայի նախագահը նշեց, որ 3 օրվա ընթացքում արդեն իսկ բացահայտել են այն ոլորտները, որտեղ համագործակցությունն ու ներդրումներն ավելի գրավիչ են՝ սնունդ, տեքստիլ արդյունաբերություն, էկոտուրիզմ։ Միաժամանակ տեղի գործարարներն իրենք պետք է օգնեն ռուսական բիզնեսին հայկական շուկա մուտք գործելու համար՝ ներկայացնելով ներդրումային ամբողջ գրավչությունը:

«1988 թվականի աղետալի երկրաշարժի հետևանքով արդյունաբերական ներուժը կորցրած քաղաքը քիչ–քիչ սկսում է վերագտնել հատկապես տեքստիլ արդյունաբերական պոտենցիալը: Գյումրին նաև զբոսաշրջային հարուստ ժառանգություն ունեցող քաղաք է,– ներկայացնելով համագործակցության հնարավորությունները` ասաց Գյումրու քաղաքապետ Վարդգես Սամսոնյանը և ավելացրեց, – որպես քաղաքային իշխանություններ` հնարավոր ներդրումների դեպքում պատրաստ ենք աջակցել»։

Հանդիպման ընթացքում ռուսական պատվիրակության անդամները տեղեկացրին, որ մայիսն Երևանում տեղի է ունենալու հայ-ռուսական բիզնես համաժողով, որին մասնակցելու ու նոր գործարար կապեր ստեղծելու են հրավիրվում նաև Գյումրու գործարարները: