ԵՐԵՎԱՆ, 29 նոյեմբերի – Sputnik. ՀՀ Սյունիքի մարզի Գորիս խոշորացված համայնքի ղեկավար Առուշ Առուշանյանն ու Քարահունջի ղեկավար Լուսինե Ավետյանը չեն ընդունում իրենց առաջադրված մեղադրանքները։
Նշենք, որ Սյունիքի մարզի ընդհանուր իրավասության դատարանի Գորիսի նստավայրում ընթանում է Առուշանյանի և մյուսների գործով դատական նիստը։
Դատարանը, մեղադրող կողմի առաջարկին ընդառաջելով, արգելեց ԶԼՄ–ներին ուղիղ եթերով հեռարձակել նիստը, սակայն թույլատրեց տեսագրել։
Մեղադրող կողմը ներկայացրեց մեղադրանքը, որն Առուշանյանը չընդունեց։
«Այն, ինչ լսեցի, իրականությանը չի համապատասխանում։ Մեղադրանքի պարզաբանման կարիք չկա, լսում եմ նախադասություններ, որոնք ճիշտ չեն»,– ասաց Առուշանյանը և հավելեց, որ իր դիրքորոշումը հիմնավոր կներկայացնեն փաստաբանները։
Մեղադրող կողմը ներկայացրեց նաև Լուսինե Ավետյանի մեղադրանքը, որը վերջինս նույնպես չընդունեց։
«Ինձ համար ամեն ինչ պարզ է, մեղքս չեմ ընդունում»,– ասաց Քարահունջի ղեկավարը։
Դատական նիստին նախատեսվում է հարցաքննել գործով ամբաստանյալ Ավետյանին։
Հիշեցնենք, որ Առուշ Առուշանյանին մեղադրանք է առաջադրվել ՀՀ քրեական օրենսգրքի 154.2-րդ հոդվածի 4-րդ մասի 2-րդ կետի (ընտրողի կամքի ազատ իրականացմանը խոչընդոտելը), 149-րդ հոդվածի 2-րդ մասի 4-րդ կետի (պաշտոնեական դիրքն օգտագործելով ընտրական իրավունքի իրականացումը) և 154.2-րդ հոդվածի 3-րդ մասի (քվեարկության գաղտնիությունը խախտելը) հատկանիշներով։
Այս քրեական գործին միացվել է մեկ այլ քրեական գործ, որով Առուշանյանի նկատմամբ որպես խափանման միջոց է կիրառվել գրավը՝ 2 մլն դրամի չափով։ Առուշ Առուշանյանը կալանավորված է 2021 թվականի հուլիսի 16-ից։
Ավետյանին մեղադրանք է առաջադրվել ընտրական իրավունքի իրականացմանը, ընտրական հանձնաժողովների աշխատանքներին կամ ընտրությանը մասնակցող անձանց լիազորությունների իրականացմանը խոչընդոտելու և քվեարկության գաղտնիությունը խախտելու հատկանիշներով:
Գորիս համայնքի ղեկավար Առուշ Առուշանյանի պաշտպան Արման Մելքոնյանն ավելի վաղ ասել էր, որ Ավետյանը ցուցմունք է տվել Գորիսի համայնքապետի դեմ։ Փաստաբանի խոսքով՝ Առուշանյանը կալանավորվել է այդ ցուցմունքի հիման վրա։