ԵՐԵՎԱՆ, 6 նոյեմբերի – Sputnik. Ռուսական Artik & Asti փոփ-դուետի բաժանման լուրերը մի քանի օր է` քննարկվում են համացանցում։ Տասը տարի բեմում միասին հանդես եկած Արթիկը և Աննա Ձյուբան հայտնել են, որ դուետը այլևս չի լինելու նույն կազմով։ Աննան ասել է, որ լքում է խումբը, քանի որ ուզում է իրեն տրամադրել ամուսնուն և տնական կյանքին, գրում է Starhit-ը։
«Անյան հավանաբար կսկսի իր սոլո կարիերան, իսկ ես կշարունակեմ անել այն, ինչով զբաղվել եմ ամբողջ կյանքում՝ գրել երգեր, փնտրել նոր տաղանդներ և օգնել նրանց ինքնադրսևորվել», - ասել է Արթիկը։
Երկրպագուները հրաժարվում էին հավատալ, որ Աննան իսկապես լքում է դուետը` ասելով, որ երևի կատակ է կամ PR։
Բայց համոզվելով, որ ամեն ինչ իրական է` երկրպագուները սկսել են ենթադրել, թե ով կփոխարինի անփոխարինելի թվացող Աննային։ Երկրպագուների կարծիքով` երգչուհու տեղը կարող է զբաղեցնել 28-ամյա Մերի Գուն, որը հայտնի է «Don't Get Used» հիթով։ Նաև TikTok-ում տեսանյութ է տարածվում, որտեղ ասվում է, որ ծագող աստղ Չեզարան կարող է դառնալ դուետի մենակատարը:
Նշենք, որ Artik&Asti-ն հայտնի է իր պարային հիթերով՝ «Девочка, танцуй», «Чувства», «Все мимо», «Истеричка» և այլն։