Լեռնային Ղարաբաղում ռուսական խաղաղապահ զորախմբի մարդասիրական արձագանքման կենտրոնի մասնագետները և «Մերսի» բարեգործական հիմնադրամի ներկայացուցիչները հումանիտար օգնություն են ցուցաբերել Գիշի գյուղում գտնվող բազմազավակ ընտանիքներին և վերաբնակվածներին։ Տեղեկությունը հայտնում է Ռուսաստանի պաշտպանական գերատեսչությունը:
Խաղաղապահները մարդասիրական ակցիա են անցկացրել Մարտունու շրջանի Գիշի գյուղի միջնակարգ դպրոցում և մանկապարտեզում։ Բնակիչներին հանձնել են ավելի քան 2 տոննա ընդհանուր քաշով մարդասիրական բեռ՝ դպրոցական հավաքածուների, մանկական և մեծահասակների կոշիկների, հագուստի տեսքով:
«Այսօր Գիշի գյուղում էինք, առաջին հերթին Գիշիի դպրոցում էինք, որտեղ սովորում է 150 երեխա։ Մինչև 4-րդ դասարանի երեխաներին հանձնեցինք ուսապարկեր, դպրոցական պարագաներ, բացարձակապես բոլոր երեխաներին բաժին հասավ կոշիկ և հագուստ ։ Բացի դպրոցահասակ երեխաներից, հրավիրել ենք նաև գյուղի բնակիչներին, որոնց նույնպես տրամադրել ենք կոշիկ և հագուստ ։ Առանձին օգնություն կար նաև Շուշիից գաղթած ընտանիքի համար։ Այս պահին գտնվում ենք Գիշիի մանկապարտեզում, որտեղ երեխաներին բերել են խաղալիքներ, նկարչության դասի համար անհրաժեշտ պարագաներ, ինչպես նաև դպրոցական նախապատրաստական պարագաներ»,– ասել է բարեգործական կազմակերպության ներկայացուցիչ Բադալ Պարյանը։
Նա նշել է, որ մանկապարտեզի երեխաները հյուրերին հաճելի անակնկալ են մատուցել. նրանք հայերեն ու ռուսերեն երգեր են երգել, ասմունքել հայերեն և ռուսերեն:
Դպրոցականները, ի նշան երախտագիտության, խաղաղապահների և բարերարների համար պատրաստել են ելույթ ազգային պարերի, երգերի կատարման, բանաստեղծությունների ընթերցանության տեսքով։
Նշենք, որ մարդասիրական ակցիայի շրջանակներում աջակցություն է ցուցաբերվել Գիշի գյուղի 950 կարիքավոր բնակիչների։
Հիշեցնենք` 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության համաձայն` Լեռնային Ղարաբաղի շփման գծի և Լաչինի միջանցքի երկայնքով տեղակայվեց Ռուսաստանի Դաշնության խաղաղապահ զորակազմը՝ 1960 զինծառայողներով, հրաձգային զենքով, 90 զրահամեքենաներով, 380 միավոր ավտոմոբիլային և հատուկ տեխնիկայով:
Ռուսաստանի Դաշնության խաղաղապահ զորակազմը տեղակայվել է 5 տարի ժամկետով, որից հետո այդ ժամանակահատվածը մեխանիկորեն կերկարաձգվի ևս 5 տարով, եթե կողմերից որևէ մեկը ժամկետի ավարտից 6 ամիս առաջ չհայտարարի տվյալ դրույթի կիրառումը դադարեցնելու մտադրության մասին: