ԵՐԵՎԱՆ, 27 սեպտեմբերի – Sputnik. 2021թ.–ի առաջին կիսամյակում Հայաստանի տնտեսությունը գրանցել է 5 տոկոս տնտեսական աճ։ Այսօր ԱԺ ֆինանսավարկային ու բյուջետային հարցերի մշտական հանձնաժողովի նիստում տեղեկությունը հայտնեց ՀՀ ֆինանսների նախարար Տիգրան Խաչատրյանը` ներկայացնելով 2021 թվականի պետական բյուջեի կատարման ընթացքը։
«Բոլոր ոլորտները աճի միտում են արձանագրել։ Առավել բարձր աճ են արձանագրել ծառայություններն ու առևտուրը, բայց նաև շինարարությունը, գյուղատնտեսությունը և արդյունաբերությունը։ Արդյունաբերության աճը հիմնականում պայմանավորված է եղել հանքագործական արդյունաբերության ու բաց հանքերի շահագործման հետ, գյուղատնտեսությունը հիմնականում աճել է բուսաբուծության ոլորտում դիտարկված բարձր տնտեսական ակտիվությամբ, շինարարությունն աճել է առավելապես պետական բյուջետային միջոցներով ու բնակչության միջոցներով իրականացված շինաշխատանքների հաշվին»,– ասաց Խաչատրյանը։
Տարին աչքի է ընկել նաև գնաճի բարձր ցուցանիշներով։ Նախարարի խոսքով` այն կազմել է 5.7 տոկոս։ Սննդամթերքի և ոչ ալկոհոլային խմիչքների գնաճը կազմել է 7.7 տոկոս, ալկոհոլային խմիչքներինն ու ծխախոտինը` 9.1, ոչ պարենային ապրանքների գները` 7.9, իսկ ծառայությունների սակագները` 2 տոկոս։
Աշխատավարձերը, ըստ նախարարի, այս տարի հունվար–հունիսին աճել են 5.4 տոկոսով, ընդ որում`պետական հատվածում` 3.9 տոկոսով, մասնավոր հատվածում` 5.9 տոկոսով։ Արդյունքում պետական միջին աշխատավարձն այդ ժամանակահատվածում կազմել է 168 300 դրամ, մասնավորում` 209 900 դրամ։