ԵՐԵՎԱՆ, 10 սեպտեմբերի - Sputnik. Վերակառուցվում է Արագածոտնի մարզի Օհանավան համայնքի միջնակարգ դպրոցը։ Տեղեկությունը հայտնում է ՀՀ փոխվարչապետ Սուրեն Պապիկյանը` ֆեյսբուքյան իր էջում գրառում անելով։
Նրա խոսքով՝ դպրոցը վերակառուցվում է Հայաստանի տարածքային զարգացման հիմնադրամի կողմից իրականացվող «Դպրոցների սեյսմիկ անվտանգության բարելավման ծրագրով»։
Макет средней школы общины Оганаван Арагацотнской области после реконструкции
Դպրոցի վերակառուցման համար ՀՀ կառավարության և Ասիական զարգացման բանկի կողմից ներդրվել է 880 մլն ՀՀ դրամ։
Նշենք, որ Օհանավանի Ս․ Ավետիսյանի անվան դպրոցի շենքը կառուցվել է 1959թ., երբեք հիմնովին չի նորոգվել, մասնակի նորոգման աշխատանքներ իրականացվել են միայն 2004թ., որով խնդիրները, սակայն, չեն լուծվել։
«Մեծ խնդիրներ էին առաջանում հատկապես ձմռանը, երբ ջեռուցման առկայությամբ անգամ հնարավոր չէր լինում տաքացնել դասասենյակները: Դպրոցը չուներ միջոցառումների սրահ, լաբորատորիաներ, իսկ մարզադահլիճը վերջին տարիներին հնարավոր չէր շահագործել»,-նշել է Պապիկյանը։
Նրա խոսքով՝ նոր կառուցվող դպրոցը վերջնականապես կլուծի այդ խնդիրները, շենքում կլինեն լաբորատորիաներ, հարմարավետ դահլիճ ու մարզադահլիճ, կառույցը լիարժեքորեն կհարմարեցվի ներառական կրթության համար, կտեղադրվի վերելակ։ Դպրոցը նախագծվել է 432 աշակերտի համար։ Շինարարությունն ակտիվ ընթացքի մեջ է, որի ավարտը նախատեսվում է 2022թվականին։
Նշենք, որ ՀՀ կառավարության և Ասիական զարգացման բանկի համատեղ ծրագրի շրջանակում այս տարի վերակառուցվեց նաև Վարդգես Պետրոսյանի անվան հ.51 հիմական դպրոցը, որում սովորում է 1192 աշակերտ:
Ի դեպ, նոր ուսումնական տարին վերակառուցված ու հարմարավետ պայմաններով են դիմավորել նաև Երևանի 135 և 143 դպրոցները: