2021 թվականին հարկային եկամուտներն աճել են ի հաշիվ անցած տարվա տնտեսական անկման և այս տարվա ընթացքում արձանագրված գնաճի։ Sputnik Արմենիայի հետ զրույցում այս մասին ասաց տնտեսագետ Սուրեն Պարսյանը։
«Մեր տնտեսական ակտիվությունը շատ համեստ է տարածաշրջանի մյուս երկրների համեմատ։ Այս տարվա 7 ամիսների հաշվարկով մենք ունենք 5.2 տոկոս տնտեսական ակտիվություն, Վրաստանում այդ ցուցանիշը կազմել է 12.3 տոկոս, այսինքն` 2.5 անգամ ավելի շատ։ Սա փաստում է, որ հարկային եկամուտներն աճել են ոչ թե ներդրումների, տնտեսական ակտիվության, այլ գնաճի և անցած տարվա վատ ցուցանիշների ֆոնին»,- ասաց նա։
Նրա խոսքով` պաշտոնական վիճակագրությունը փաստում է, որ այս տարի օտարերկրյա ներդրումները կազմել են ընդամենը 33 մլն դոլար, փոխարենը 2021 թվականի ընթացքում որոշակի հարկային դրույքաչափերի բարձրացում է տեղի ունեցել, հետևաբար` հարկային եկամուտների աճը իներցիոն է։
«Հավաքագրված եկամուտներն ավելի քիչ գնողունակություն ունեն։ Անցած տարվա հավաքագրված հարկերով պետությունը կարող էր ավելի շատ գնումներ կատարել, քան այս տարվա հարկերով` նկատի ունենալով գնաճը և այլ ցուցանիշներ»,- նշեց Պարսյանը։
Տնտեսագետն արձանագրեց, որ կառավարությունը մի կողմից խոսում է հարկային մուտքերի ավելացման մասին, մյուս կողմից մեկ միլիարդ դոլարի չափով ավելացնում է պետական պարտքը։ Գաղտնիքը դրսից բերված ֆինանսական հոսքերի մեջ է, որը չի կարող երկար շարունակվել։
«Ակնհայտ է, որ կառավարության ֆինանասական քաղաքականությունը ձախողված է, և նա փորձում է դրսից ներարկումների միջոցով պահել տնտեսական ակտիվությունը։ Դրսից կարելի է 1-2 տարի ևս պարտքով գումար բերել, ծախսել և հարկային եկամուտների աճ ցույց տալ, բայց դա երկարաժամկետ ու որակյալ աճ չէ։ Այդ աճից ինչպես նախկինում, այնպես էլ հիմա, օգտվում են մենաշնորհային դիրք ունեցողները, հանքարդյունաբերողները և խոշոր շինարարական կազմակերպությունները»,- հավելեց Պարսյանը։
Նշենք, որ երեկ` սեպտեմբերի 8-ին, ՀՀ պետական եկամուտների կոմիտեն հրապարակեց 2021 թվականի հունվար-օգոստոս ամիսների ցուցանիշները, ըստ որի` այդ ժամանակահատվածում հարկային եկամուտները կազմել են 984 մլրդ դրամ:
2020թ. նույն ժամանակաշրջանում ցուցանիշը կազմել է 888 մլրդ դրամ, 2019թ-ին՝ 937 մլրդ դրամ, իսկ 2018թ-ին՝ 773 մլրդ դրամ:
Այսպիսով, նախորդ տարվա նույն ժամանակաշրջանի համեմատ պետական բյուջեի հարկային եկամուտները աճել են 96 մլրդ դրամով կամ 11%-ով, 2019թ. հունվար-օգոստոս ամիսների համեմատ՝ 46 մլրդ դրամ կամ 5%, 2018 թվականի համեմատ՝ 211 մլրդ դրամ կամ 27%: