ԵՐԵՎԱՆ, 1 սեպտեմբերի – Sputnik. ԱԺ «Պատիվ ունեմ» խմբակցության պատգամավորներ Թագուհի Թովմասյանն ու Տարոն Մարգարյանը երեկ այցելել են կալանքի տակ գտնվող «Հայաստան» դաշինքի պատգամավորներին՝ Մեղրիի նախկին քաղաքապետ, այժմ պատգամավոր Մխիթար Զաքարյանին և Սիսիանի նախկին քաղաքապետ, այժմ պատգամավոր Արթուր Սարգսյանին:
«Պետք է ընդգծեմ, որ երկու պատգամավորներն էլ ընկճված չէին, ֆիզիկապես առողջ էին, իսկ խոսակցություններից պարզվեց՝ ակտիվ հետևում էին ներքաղաքական զարգացումներին և մեր երկրի առաջ ծառացած մարտահրավերներին»,–Facebook–ի իր էջում տեղեկացրել է Թագուհի Թովմասյանը:
Նրա խոսքով` Արթուր Սարգսյանի և Մխիթար Զաքարյանի միակ անհանգստությունը Սյունիքի գլխին կախված վտանգներն են:
Իսկ երբ հետաքրքրվել են 44-օրյա պատերազմի ընթացքում Մխիթար Զաքարյանի ստացած վնասվածքների վիճակից, ասել է, որ ձեռքը կրկին վիրահատելու անհրաժեշտություն կա. երկաթները պետք է հանվեն մարմնից:
«Ես տեղում ՔԿՀ ղեկավարությունից հետաքրքրվեցի, թե ինչ քայլեր են անում Զաքարյանի վիրահատությունը կազմակերպելու համար, և ինձ հավաստիացրին, որ վիրահատությունն առաջիկայում կկազմակերպվի, և որ հարցը փաստաթղթերի հավաքագրման փուլում է: Այս հարցում հետևողական եմ լինելու»,–նշել է Թովմասյանը։
Ընտրություններից հետո Սյունիքի նախկին և ներկա որոշ պաշտոնյաների դեմ քրեական գործեր են հարուցվել։ Կալանավորվել են Քաջարանի համայնքի ղեկավար Մանվել Փարամազյանը, Մեղրիի նախկին համայնքապետ Մխիթար Զաքարյանը, Որոտանի համայնքապետ Սուրեն Օհանջանյանը, Գորիսի համայնքապետ Առուշ Առուշանյանը, Գորիսի մշակութային կենտրոնի տնօրեն Հայկ Խաչատրյանը։
Հիշեցնենք, որ հուլիսի 11-ին ՀՀ ԿԸՀ–ն բավարարել էր դատախազության միջնորդությունը՝ Մեղրիի նախկին համայնքապետ, «Հայաստան» դաշինքի պատգամավորության թեկնածու Մխիթար Զաքարյանի նկատմամբ քրեական հետապնդում հարուցելու ու նրան կալանավորելու թույլտվություն տալու մասին:
Մխիթար Զաքարյանը մեղադրվում է խուլիգանություն կատարելու համար։ Նա չի ընդունում մեղադրանքը։
Իսկ հուլիսի 13-ին ՀՀ գլխավոր դատախազությունը կենտրոնական ընտրական հանձնաժողով միջնորդություն էր ներկայացրել Սիսիանի համայնքապետ Արթուր Սարգսյանին անձեռնմխելիությունից զրկելու համար: Հուլիսի 15-ին ԿԸՀ–ն բավարարել էր միջնորդությունը, և Սարգսյանը ձերբակալվել էր։
Արթուր Սարգսյանին մեղադրանք է առաջադրվել ՀՀ քրեական օրենսգրքի 308-րդ հոդվածի 2-րդ մասով (պաշտոնեական լիազորությունները չարաշահելը) և 314-րդ հոդվածի 1-ին մասով (պաշտոնեական կեղծիքը)։
Սարգսյանն իրեն առաջադրված մեղադրանքը չի ընդունում։
Սարգսյանն իրեն առաջադրված մեղադրանքը չի ընդունում։