ԵՐԵՎԱՆ, 16 օգոստոսի -Sputnik. «Թալիբան» շարժման ներկայացուցիչները հաստատել են, որ Աֆղանստանում ռուս դիվանագետների գլխից մազ չի պակասի, դեսպանատան պահպանությանն արդեն թալիբներն են ապահովում աֆղանցի զինվորականների փոխարեն։ Տեղեկությունը «Ռոսիա 24» հեռուստաալիքի եթերում հայտնել է Քաբուլում Ռուսաստանի դեսպան Դմիտրի Ժիրնովը:
«Մեր դեսպանատունն արդեն պահպանում են թալիբները։ Այսօր տեղի ունեցավ հանձնում. հեռացան աֆղանցի զինվորականները, աֆղանական ազգային անվտանգության այն զինվորականները, որոնք մեզ հսկում էին։ Թալիբներ ևս մեկ անգամ վերահաստատել են, որ ռուսական դիվանագիտներից ոչ ոք չի տուժի, կարող են հանգիստ աշխատել», — ասել է Ժիրնովը։
Ավելի վաղ ԶԼՄ-ները, վկայակոչելով թալիբներին, հայտնել էին, որ իրենց վերահսկողության տակ են գտնվում աֆղանական պետական շենքերի ավելի քան 90 տոկոսը և Քաբուլի գրեթե բոլոր հիմնական հսկիչ անցակետերը:
Աֆղանստանում իրավիճակը հատկապես սրվել է վերջին շաբաթներին՝ խոշոր քաղաքների վրա թալիբների հարձակմամբ (շարժումը ճանաչվել է ահաբեկչական և արգելված է ՌԴ-ում): Կիրակի ԶԼՄ-ները հայտնել են, որ ապստամբները վերահսկում են բոլոր սահմանային անցակետերը։ Ավելի ուշ գրոհայինները հայտարարել էին, որ մտել են Քաբուլ և վերահսկողության տակ վերցրել նախագահական պալատ։
Աֆղանստանի նախագահ Աշրաֆ Ղանին հայտարարել է, որ լքել է երկիրը, «որպեսզի կանխի արյունահեղությունը»: Երկուշաբթի գիշերը «Թալիբանի» քաղաքական կազմակերպության պաշտոնական ներկայացուցիչ Մուհամեդ Նաիմը հայտարարել է, որ Աֆղանստանում պատերազմն ավարտված է, իսկ երկրում կառավարման ձևը պարզ կդառնա մոտ ժամանակներս: