ԵՐԵՎԱՆ, 17 ապրիլի - Sputnik. Ամենայն Հայոց Կաթողիկոսը և Արցախի նախագահը քննարկել են արցախահայության առջև ծառացած մարտահրավերները և արցախյան երկրորդ պատերազմի հետևանքների հաղթահարմանն ուղղված քայլերը։ Տեղեկանում ենք Մայր աթոռի տեղեկատվական համակարգից։
Այսօր Ն.Ս.Օ.Տ.Տ. Գարեգին Երկրորդ Ծայրագույն Պատրիարք ամենայն Հայոց կաթողիկոսը Մայր աթոռ Սուրբ Էջմիածնում ընդունել է Արցախի նախագահ Արայիկ Հարությունյանին։
«Երկուստեք կարևորվել է համազգային ներուժի և ջանքերի մեկտեղումը՝ ի զորակցություն Արցախի ժողովրդի։ Զրույցի ընթացքում անդրադարձ է կատարվել ներկա պայմաններում արցախահայության, մասնավորապես զոհված, գերության մեջ գտնվող զինվորականների և անհայտ կորածների ընտանիքների հոգևոր խնամքի և աջակցության Մայր Աթոռի ծրագրերին»,–նշված է հաղորդագրության մեջ։
Արցախի նախագահը շնորհակալություն է հայտնել կաթողիկոսին Մայր Աթոռի և նրա աշխարհասփյուռ թեմերի զորակցության համար պատերազմի ընթացքում և հետպատերազմյան շրջանում։
Նրանք քննարկել են նաև Արցախի բռնազավթված տարածքներում պատմամշակութային և հոգևոր ժառանգության պահպանության, դրանց նկատմամբ ոտնձգությունների և վայրագությունների կասեցման ուղղությամբ Հայոց եկեղեցու կողմից ձեռնարկվող քայլերը։
Արման Թաթոյանը հայկական եկեղեցու պղծման փաստերը կներկայացի միջազգային կառույցներին
Հիշեցնենք, որ Մայր Աթոռ Սուրբ Էջմիածնի և Կենտրոնական Եվրոպայի Հայրապետական պատվիրակության նախաձեռնությամբ ու աջակցությամբ 6 վիրավոր զինծառայող կմեկնի Ավստրիա` բուժման և պրոթեզավորման նպատակով։