«Հենակետ» վերլուծական կենտրոնի ղեկավար, Արցախի նախագահի նախկին խորհրդական Տիգրան Աբրահամյանի կարծիքով` քանի դեռ Գորիս-Կապան ճանապարհը շարունակում է վտանգավոր մնալ, այն պետք է գոնե ժամանակավոր շրջանցել։ Նա առաջարկում է գործող մայրուղու փոխարեն օգտվել Տաթևից դեպի Կապան տանող ճանապարհից, որը, իհարկե, բարվոք վիճակում չէ, բայց գոնե անվտանգ է։ Իսկ Գորիս-Կապան ճանապարհի վտանգավորության մասին նաև պաշտոնական աղբյուրներն են հայտնում. ԱԱԾ-ն նույնիսկ հեռախոսահամարներ է հրապարակել, որ գերի ընկնելու վտանգի դեպքում մեր հայրենակիցները զանգահարեն։
«Նույնիսկ այն պարագայում, եթե ռուսական կողմի միջնորդությամբ որոշ ժամանակ անց Գորիս-Կապան ճանապարհն անվտանգ դառնա, այն չի կարող այնքան անվտանգ լինել, ինչպես եղել է մինչև ռազմական գործողությունները։ Այս իրավիճակում պետք է դիտարկել այլընտրանքային ճանապարհների կա՛մ կառուցման, կա՛մ վերակառուցման հարցը»,- ասաց նա։
Նրա խոսքով` Սյունիքի և հարակից բնակավայրերի անվտանգային հարցերի վերաբերյալ տարբեր պետական կառույցների կողմից հնչեցրած հայտարարություններն ավելի խոցելի են դարձնում մեր քաղաքացիների անվտանգությունը։ Այլ հարց է, որ Ադրբեջանի վերահսկողության տակ անցած որոշ տարածքներ չեն արտացոլում նոյեմբերի 9-ի հրադադարի եռակողմ հայտարարության բովանդակությունը. չէ որ Գորիս-Կապան ճանապարհի մասին, որն անցնում է նախկին Կուբաթլուի և Զանգելանի շրջաններով, որևէ խոսք չկա հայտարարության մեջ։
«Խնդիրը նրանում է, որ իշխանությունների կամ գաղտնի համաձայնության, կամ անգործունակության հետևանքով այդ ճանապարհները հայտնվել են Ադրբեջանի վերահսկողության ներքո»,- նշեց նա։
Աբրահամյանը չի բացառում, որ նոյեմբերի 9-ի հայտարարությունից զատ, իշխանությունը ևս մեկ նոր փաստաթուղթ է ստորագրել, որի հիման վրա էլ Ադրբեջանին են անցնում այն տարածքները, որոնց մասին հայտարարության տեքստում նշված չէ, կամ էլ եռակողմ հայտարարությունն ունի գաղտնի հավելված, որը գործող իշխանությունը հասարակությունից թաքցնում է։ Մեկ այլ վարկածով` տեղի ունեցողը Հայաստանում իշխանության բացակայության և պետական կառույցների կազմալուծման հետևանք է, և թշնամին անում է այն, ինչ ուզում է։
Հիշեցնենք` դեկտեմբերի 22-ին Sputnik Արմենիայի հետ զրույցում ԱԱԾ սահմանապահ ծառայությունից հաստատել էին սոցցանցերում տարածված տեղեկությունը, թե Ազգային անվտանգության ծառայության աշխատակիցները, որոնք պարեկություն են իրականացնում Սյունիքի մարզի Գորիս-Կապան ավտոճանապարհին, Հայաստանի քաղաքացիներին հատուկ հեռախոսահամարներ են բաժանում՝ արտակարգ դեպքերում զանգահարելու համար։