ԵՐԵՎԱՆ, 25 փետրվարի — Sputnik. Ազգային ժողովի նախկին նախագահ Արա Բաբլոյանը կարծում է, որ ՀՀ երրորդ նախագահ Սերժ Սարգսյանի դեմ հարուցված քրեական գործը շինծու է։ Բաբլոյանը նման կարծիք հայտնեց Երևանի ընդհանուր իրավասության դատարանի բակում` լրագրողների հետ զրույցում։
Նշենք, որ քիչ հետո կսկսվի Սարգսյանի դեմ հարուցված քրգործով առաջին դատական նիստը։ Դատարանի բակում ՀՀԿ–ականներ են հավաքվել` ի պաշտպանություն նրա։
«Սերժ Սարգսյանը չի կարող պատասխանատվություն կրել, քանի որ նման արարք չէր կարող թույլ տալ. ես շատ լավ եմ ճանաչում նրան»,–ասաց Բաբլոյանը։
Նրա խոսքով` Սարգսյանին ներգրավելն այս գործում քաղաքական ենթատեքստ ունի։
Հարցին, թե այդ դեպքում ինչու է նախկին գյուղնախարար Սերգո Կարապետյանը նման ցուցմունք տվել Սարգսյանի դեմ, Բաբլոյանը պատասխանեց, որ չի սիրում մարդկանց մասին խոսել, բայց մարդիկ տարբեր են։
Սերժ Սարգսյանի թիկնազորի նախկին պետի 40 մլն դրամ շորթելու գործը կարճվել է. ՀՔԾ
Հիշեցնենք` Սերժ Սարգսյանին մեղադրանք է առաջադրվել գյուղացիներին դիզելային վառելանյութ հատկացնելիս ֆինանսական խախտումներ իրականացնելու համար։ Սարգսյանին մեղադրում են, որ նա 2013թ.-ին հովանավորչություն է ցուցաբերել «Ֆլեշ» ընկերության նկատմամբ։ ՍՊԸ–ն հաղթել է դիզելային վառելիք առաքելու պետական մրցույթում, թեև առավել բարձր գին է առաջարկել, քան նրա մրցակիցը (մոտավորապես մեկ միլիոն դոլար տարբերությամբ)։
Սարգսյանի նկատմամբ խափանման միջոց է ընտրվել երկրից չհեռանալու մասին ստորագրությունը։