Հայկ Հարությունյանի մահվան դեպքի առթիվ հարուցված քրեական գործով վկայի կարգավիճակով հարցաքննվել են Hayeli.am և Armlur.am կայքերի խմբագիրները: Այս մասին հայտնում են ՔԿ տեղեկատվության և հասարակայնության հետ կապերի բաժնից:
«Նրանք հրաժարվել են հարցաքննության ընթացքը տեսանկարահանելու վերաբերյալ նախաքննական մարմնի առաջարկից և մեջբերելով «Զանգվածային լրատվության մասին» ՀՀ օրենքի 5-րդ հոդվածը՝ չեն բացահայտել տեղեկատվության աղբյուրը»,- նշված է կոմիտեի տարածած հաղորդագրության մեջ:
Նշվում է, որ քննիչի դիտարկմանը, թե դեպքի ականատես վկան, ծանոթանալով հրապարակումներին, ժխտել է հրապարակումներում ներկայացված հանգամանքները, լրատվամիջոցների ներկայացուցիչները դիրքորոշում չեն հայտնել և պարզաբանել են, որ իրենք ընդամենը հրապարակել են իրենց աղբյուրների հայտնած տեղեկատվությունը՝ կրկին հրաժարվելով բացահայտել աղբյուրը:
Որևէ բան բացառել պետք չէ. ՀՔԾ պետի տեղակալը` Հարությունյանի մահվան ու Մարտի 1–ի կապի մասին
ՔԿ-ից հայտնում են, որ Հայկ Հարությունյանի մահվան դեպքին ականատես վկան իր լրացուցիչ ցուցմունքում հայտնել է, որ ԶԼՄ-ներին դեպքի վերաբերյալ որևէ տեղեկատվություն չի հայտնել: Ավելին՝ նա վրդովմունք է հայտնել՝ ԶԼՄ-ներում տեղ գտած ապատեղեկատվության վերաբերյալ:
Նշենք, որ Hayeli.am կայքը լուր է հրապարակել «Ինձ պարտադրում են սուտ ցուցմունք տալ, ախր Ռոբերտ Քոչարյանն ու Գեղամ Պետրոսյանը մեղավոր չեն». Հայկ Հարությունյանի վերջին խոսքերը ինքնասպանությունից առաջ» վերտառությամբ:
Քննչական կոմիտեն հայտարարում է, որ Hayeli.am կայքում հրապարակված լուրը չի համապատասխանում իրականությանը:
Հիշեցնենք, որ օգոստոսի 23-ին, ժամը 23։50-ին ոստիկանությունը ահազանգ էր ստացել, որ Բջնիի իր առանձնատանը հայտնաբերվել է ՀՀ նախկին ոստիկանապետ, գեներալ–գնդապետ Հայկ Հարությունյանի դին` գլխի շրջանում ստացած հրազենային վնասվածքով։
Ավելի ուշ հայտնի էր դարձել, որ նախկին ոստիկանապետը վերջին մի քանի օրը ամառանոցում է եղել, ընդ որում՝ ոչ մենակ:
Sputnik Արմենիային դեպքից որոշ մանրամասներ էին հայտնի դարձել. նախկին ոստիկանապետը թոշակի անցնելուց հետո ժամանակի մեծ մասն անցկացնում էր Բջնիի ամառանոցում:
Ըստ շրջանառվող լուրերի` տանը եղած անձն է լսել կրակոցի ձայնը, ապա հյուրասենյակում գտել Հարությունյանի դին: Նա խուճապահար դուրս էր եկել տնից ու պատահական անձանցից օգնություն խնդրել:
Մարդիկ արձագանքել են և կատարվածի մասին տեղեկացրել իրավապահներին, նաև ահազանգել շտապօգնություն:
Քննչական կոմիտեն հայտնել էր, որ սեպտեմբերի 24-ին հարցաքննվել էր մահվան օրը նրա հետ գտնվող անձը, որն ասել էր, որ իր և Հարությունյանի խոսակցության բովանդակությունը առնչություն չի ունեցել Մարտի 1-ի դեպքերի առթիվ քննվող քրեական գործի շրջանակներում նրա վրա ճնշումներ գործադրելուն և, առհասարակ, որևէ անձի կողմից ճնշումներ գործադրելուն:
Հիշեցնենք, որ մարտի 1-ի գործում ներգրավված է շուրջ 800 վկա։ Նրանց շարքում նշվում էր նաև նախկին ոստիկանապետ Հայկ Հարությունյանի անունը։
Հայկ Հարությունյանը հոկտեմբերի 20-ին կդառնար 64 տարեկան: