ԵՐԵՎԱՆ, 17 հունիսի — Sputnik.Հայաստանում մարդկության պատմության մեջ եզակի, բիրտ ճնշումներ են իրագործվում դատարանների վրա։ Այսօր լրագրողների հետ հանդիպման ժամանակ այս մասին ասաց ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը։
«Մարդկության պատմության մեջ աննախադեպ ճնշում էր սա։ Որևիցե երկրի փաստաբանից չեմ լսել, որ դատարանների նկատմամբ նման ճնշումներ լինեն՝ նույնիսկ այն երկրներում, որոնց համարում ենք հետամնաց։ Մենք տեսանք այն, ինչ չպետք է տեսնեինք»,–ասաց նա։
Նրա խոսքով` Փաշինյանի կոչով մայիսի 20–ին դատարանների մուտք ու ելքերն արգելափակելն ու դատարանների նկատմամբ աննախադեպ ճնշումները նպատակ ունեին ոչ միայն ճնշել Քոչարյանի գործով դատավորին, այլ նաև ահաբեկել մյուս դատավորներին, որոնք կարող են առնչվել Քոչարյանի գործին։
Անդրադառնալով Քոչարյանի գործով ինքնաբացարկ հայտնած 3 դատավորներին` պաշտպանը նշեց, որ ոչ մի դատավոր հենց այնպես ինքնաբացարկ չի հայտնում, ու եթե Քոչարյանի գործով արդեն իսկ երեք դատավոր ինքնաբացարկ է հայտնում, պետք է հասկանանք՝ ի՞նչն է պատճառը։ Ալումյանի մեկնաբանմամբ` ակնհայտ է, որ դատավորները Քոչարյանի գործի հետ կապված մտավախություն ունեն։
«Չենք կարող ջայլամի նման գլուխներս ավազի մեջ մտցնել ու ասել, որ Հայաստանում ճնշումներ չկան դատական համակարգի նկատմամբ»,–ասաց նա։
Անդրադառնալով հունիսի 14–ին ՀՀ Վերաքննիչ դատարանում ընթացող դատական նիստի ժամանակ Քոչարյանի` դատավորին ուղղված «ձեր յախան թափ տվեք այս գործից, սրանից լավ հոտ չի գալիս» հայտարարությանը` Ալումյանը նշեց, որ դա չի կարող դիտվել դատավորի նկատմամբ ճնշում։ Ըստ նրա` Քոչարյանի ասածն իրավական բանավեճի մի հնարք է, որը հաճախ է կիրառվում։
Հիշեցնենք, որ Երևանի ընդհանուր իրավասությունների Ավան և Նոր Նորք վարչական շրջանների դատարանը՝ դատավոր Դավիթ Գրիգորյանի նախագահությամբ, մարտի 18-ին որոշեց Քոչարյանին անձնական երաշխավորությամբ ազատ արձակել։
Դրանից հետո մայիսի 19–ին Նիկոլ Փաշինյանը ժողովրդին կոչ արեց մայիսի 20–ի առավոտյան փակել հանրապետության բոլոր դատարանների մուտքերը։ Ապա հանդես եկավ հայտարարությամբ, որտեղ նշեց, որ Հայաստանում հեղափոխությունը պետք է իր ավարտին մոտեցնել և բարեփոխել դատական համակարգը։
Նիկոլ Փաշինյանը Facebook–ի իր էջում ուղիղ եթերի ժամանակ ասել էր, որ դատական համակարգում «վիրահատական միջամտության» ժամանակն է։ Այդ գործընթացը պետք է արտահայտվի հետևյալ կերպ` Հայաստանի բոլոր դատավորները «վեթինգի» կենթարկվեն։
Մայիսի 20–ին ՀՀ երկրորդ նախագահ Ռոբերտ Քոչարյանի, ՀՀ նախկին փոխվարչապետ Արմեն Գևորգյանի, Պաշտպանության նախկին նախարար Սեյրան Օհանյանի և ՀԱՊԿ նախկին գլխավոր քարտուղար Յուրի Խաչատուրովի վերաբերյալ գործի վարույթը դատարանի որոշմամբ կասեցվեց և ուղարկվեց ՍԴ:
Գլխավոր դատախազությունը բողոքարկեց մայիսի 18-ի՝ Երևան քաղաքի ընդհանուր իրավասության դատարանի՝ ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումը փոփոխելու և նույն դատարանի մայիսի 20–ի՝ քրեական գործի վարույթը կասեցնելու և Սահմանադրական դատարան դիմելու որոշումը:
Բողոքարկումը քննվում է ՀՀ վերաքննիչ քրեական դատարանում։ Հերթական նիստը նախատեսված է հունիսի 18–ին, ժամը 16։00–ին։