ԵՐԵՎԱՆ, 6 հունիսի — Sputnik. Երևանում վրաերթի ենթարկված տղամարդը հիվանդանոցում մահացել է։
Sputnik Արմենիայի տեղեկություններով` այսօր, ժամը 15-ի սահմաններում Չարբախ թաղամասի Շիրակի փողոցում՝ ոստիկանական բաժանմունքի մոտակայքում, «Մերսեդես» մակնիշի ավտոմեքենան վրաերթի է ենթարկել մի հեծանվորդի։
Մոտ 40 տարեկան տղամարդը, որի ինքնությունը դեռ հայտնի չէ, ստացել էր ծանր մարմնական վնասվածքներ և անգիտակից վիճակում շտապօգնության մեքենայով տեղափոխվել Էրեբունի բժշկական կենտրոն։ Հոսպիտալացվելուց մոտ երկու ժամ անց տղամարդը մահացել է՝ այդպես էլ գիտակցության չգալով։
Նախնական տվյալներով` ավտոմեքենայի ղեկին անչափահաս է եղել, բայց մեքենան հաշվառված է տղայի մոր անվամբ, ով ներկայացել է ոստիկանության բաժանմունք։