ԵՐԵՎԱՆ, 20 դեկտեմբերի — Sputnik. «Վերականգնելու մասին խոսք լինել չի կարող։ Մեր հարաբերություններում ոչինչ չի քանդվել կամ փլուզվել, որ վերականգնենք»։ Այսպես պատասխանեց Հայաստանի և Ռուսաստանի հարաբերությունները վերականգնելու մասին հարցին ՌԴ նախագահ Վլադիմիր Պուտինը ԶԼՄ–ների ներկայացուցիչների հետ ամենամյա հանդիպման ժամանակ։
«Հայաստանը մեր ստրատեգիական ընկերն է տարածաշրջանում և ամբողջ աշխարհում։ Այն ՀԱՊԿ, ԵԱՏՄ անդամ է։ Վերականգնելու ոչինչ չկա, մենք պետք է զարգացնենք եղածը։ Հայ ժողովուրդը ռուս ժողովրդի լավ բարեկամն է»,–ասաց Պուտինը։
Նա հիշեցրեց, որ Հայաստանի և Ռուսաստանի հարաբերություններն այսպես եղել են պատմականորեն, այսպիսին կան, և հույս հայտնեց, որ այդպես էլ կշարունակվեն։
«Մեր շփումներում պետք է հաշվի առնենք աշխարհաքաղաքական և տարածաշրջանային զարգացումները»,–ասաց ՌԴ ղեկավարն ու տեղեկացրեց, որ այս բոլոր հարցերը կքննարկեն ՀՀ վարչապետի պաշտոնակատար Նիկոլ Փաշինյանի` առաջիկայում կայանալիք մոսկովյան այցի ընթացքում։