ԵՐԵՎԱՆ, 2 սեպտեմբերի — Sputnik. ՀՀ մարդու իրավունքների պաշտպանը, շնորհավորելով արցախցիներին ու ողջ հայությանը համահայկական տարեդարձի` Արցախի անկախության տոնի առթիվ, նշում է, որ Արցախը պետք է լինի քաղաքակիրթ ժողովրդավարական աշխարհի մասը։
Արման Թաթոյանն Արցախի ժողովրդավարական ճանաչելիությունը համարում է իր աշխատանքի հիմնարար ուղղություններից մեկը:
«Գլխավորապես լինելով ոչ հրապարակային՝ այն նպատակ ունի քաղաքակիրթ աշխարհին ցույց տալ Արցախն իր ժողովրդավարական ինստիտուտներով ու խթանել միջազգային իրավապաշտպան ներգրավվածությունը»,– իր ուղերձում նշում է Թաթոյանը:
Նա նաև հավելում է, որ այդ գործունեությունն անկախ է քաղաքական որևէ ազդեցությունից և իրականացվում է բացառապես իրավունքների պաշտպանության տեսանկյունից՝ օգտագործելով Մարդու իրավունքների պաշտպանի միջազգային հեղինակությունը:
Տարածքի քաղաքական կարգավիճակ, Թաթոյանի համոզմամբ, չի կարող ազդեցություն ունենալ իրավունքների պաշտպանության վիճակի վրա: