ԵՐԵՎԱՆ, 17 հուլիսի — Sputnik. Հայաստանը կարող է տեխնոլոգիական կամուրջ դառնալ Արևմուտքի և Արևելքի միջև, ստեղծել իր նոր տեխնոլոգիաները, որոնք միջազգային որակ կունենան, և տարածել դրանք եվրասիական շուկայում, համոզված է Հայաստանի նախագահ Արմեն Սարգսյանը։
«Մեր օրերում, երբ նշանակալի են ոչ այնքան բնական պաշարները, որքան նոր տեխնոլոգիաներն ու մշակումները, Հայաստանը կարող է շեշտը դնել դրա վրա։ Հիմա մենք լավ զարգացած տեխնոլոգիաներ ունենք, և այդ ոլորտի համաշխարհային ընկերություններից շատերն արդեն աշխատում են մեզ մոտ», — Sputnik Արմենիային տված բացառիկ հարցազրույցում ասաց Սարգսյանը։
Նա նշեց, որ այսօր Հայաստանում ընդհանուր մթնոլորտը դրական է. «թավշյա» հեղափոխությունից հետո երկրում տեղի ունեցած փոփոխությունները շատերն են դրական ընկալում։ Մեծ սպասումներ կան, որ փոփոխությունները կտանեն դեպի լավը, և կարևոր է, որ դրանք իրական արդյունքների վերածվեն տնտեսության և բիզնեսի մեջ։
«Մենք այսօր ունենք հսկայական առավելություն, քանի որ ԵԱՏՄ անդամ ենք։ Եվ երբ ասում եմ` ներդրումներ արեք Հայաստանում, չի նշանակում, որ ես կոչ եմ անում ներդրում անել 3,5 միլիոն բնակչությամբ երկրում։ Հայաստանը կարող է կամուրջ կամ անգամ դուռ դառնալ ահռելի եվրասիական տարածության համար, որտեղ ապրում է ավելի քան 170 միլիոն մարդ», — ասաց նախագահը։
Նա պատմեց, որ վերջերս Ֆրանսիայում հանդիպել է ֆրանսիական ընկերությունների ներկայացուցիչների հետ, օրինակ` Dassault Systèmes-ի, Orange-ի, THALES-ի։
«Հայաստանում ուժեղ են ոսկերչական գործի ավանդույթները։ Վատ չէր լինի միավորել մեր ավանդույթները և համաշխարհային տեխնոլոգիաները», — ասաց նա։
Նա նաև նշեց, որ կաջակցի Հայաստանի կառավարության` հայրենադարձությանը նպաստող ցանկացած ծրագրի։ Գլխավորը, որ երկրում մթնոլորտը նորմալ լինի, չլինի կոռուպցիա, որ դատարանները նորմալ աշխատեն, որ մարդիկ իմանան` իրենց խնդիրներն օրինական լուծում են ստանալու։
«Հիմա շատ բան արդեն արվում է ճիշտ ուղղությամբ։ Շատերը, որ գալիս են Սիրիայից, պատերազմի պատճառով գրեթե ամեն ինչ կորցրել են։ Նրանք տեղափոխվում են Հայաստան և ամեն ինչ զրոյից են սկսում։ Եվ նրանք չեն ուզում հեռանալ, այսինքն Հայաստանը նրանց համար տարանցիկ կետ չէ, նրանք ցանկանում են այստեղ ապրել», — ասաց նախագահը։
Նա կարծում է, որ ժամանակակից աշխարհում անհնար է ինչ-որ մեկին պահել նույն տեղում։ Հակառակը, պետք է այնպիսի պայմաններ ստեղծել, որ երիտասարդությունը մեկնի սովորելու Ռուսաստանում, այլ երկրներում, աշխարհի լավագույն բուհերում և հետո տուն վերադառնա ու երբեք չկորցնի հայրենիքի հետ կապը։
Նախագահի կարծիքով` Հայաստանի մոդելը պարզ է` փոքր երկիր, բայց գլոբալ ազգ։ Չէ՞ որ սփյուռքն այսօր Հայաստանի հսկայական առավելությունն է։ Նա համոզված է, որ ուժեղ սփյուռքը ուժեղ Հայաստան է։