ԵՐԵՎԱՆ, 17 հունիսի — Sputnik. Թող հայտնաբերվեն մեղավորները, թող կրեն իրենց պատիժը, բայց թող հաղթի Օրենքը։ Այսպես է կարծում ՀՀԿ խմբակցության պատգամավոր Արմեն Աշոտյանը։ Նա ֆեյսբուքյան իր էջում անդրադարձել է վարչապետ Նիկոլ Փաշինյանի վերջին ուղիղ միացմանը, որտեղ ՀՀ վարչապետը ասել է, որ ՀՀԿ պատգամավոր, ԵԿՄ վարչության նախագահ Մանվել Գրիգորյանը կասկածվում է նաև բանակի օգնությունները յուրացնելու և դրանցով իր կենդանիներին կերակրելու մեջ։
«Բարձր եմ գնահատում ՀՀ վարչապետի անմիջականությունը և կոռուպցիայի դեմ պայքարի վճռականությունը։
Պարզապես հիշեցնեմ, որ այդ ամենը պետք է իրականացվի Հայաստանի Սահմանադրության և օրենքների շրջանակներում։ Աշխարհի բոլոր մեղքերի մեջ կարելի է մեղադրել, անգամ նյութեր նախապատրաստել, նաև վստահ լինել, գուցե ապացուցել, բայց…ՕՐԵՆՔՈՎ»,–գրել է Աշոտյանը։
Պատգամավորը վարչապետին հիշեցնում է, որ երկրի օրենքների գերակայությունը, մասնավորապես, ԱԺ պատգամավորի ձերբակալության ընթացակարգի մասով, գերակա է։ Նա նկատում է, որ վարչապետը առաջ է ընկնում իրավապահ մարմնից և դատարանի նիստին զուգահեռ փաստացի հրապարակային և հանրային ճնշում ձևավորում այս հարցով։
«Մեր պաշտպանության թիրախը Մանվել Գրիգորյանը չէ, այլ երկրի Սահմանադրությունը, որը Մանվելի Գրիգորյանի դեպքում կոպտորեն խախտվում է։ Թող հայտնաբերվեն մեղավորները, թող կրեն իրենց պատիժը, բայց թող հաղթի ՕՐԵՆՔԸ։
Ընտրովի արդարությունը, հատվածական օրինականությունը և սեփական ընկալումները պետությունից վեր դասելը ոչ մի լավ տեղ չեն տանում։
DURA LEX SED LEX սկզբունքը այլընտրանք չունի»,–իր խոսքն ավարտում է Արմեն Աշոտյանը։
Հիշեցնենք` հունիսի 16-ին Էջմիածնում ԱԱԾ աշխատակիցները ձերբակալել են ՀՀԿ խմբակցության պատգամավոր Մանվել Գրիգորյանին ու տեղի քրեական հեղինակություն Արթուր Ասատրյանին, որը հայտնի է «Դոն Պիպո» մականունով։ Երկուսն էլ կասկածվում են ապօրինի զենք-զինամթերք պահելու մեջ։Այս պահին Նոր Նորքի դատարանի մոտ Մանվել Գրիգորյանի կողմնակիցներն ակցիա են անում` պահանջելով ազատ արձակել Արցախի հերոսին։