ԵՐԵՎԱՆ, 23 ապրիլի — Sputnik. Երևանում առավոտից մեկնարկել են բողոքի ակցիանները։ Դրանք ուղեկցվում են նաև դասադուլներով։ ԵՊՀ–ի մոտ ուսանողները, դասադուլին զուգահեռ, նստացույց էին հայտարարել: Կարճ ժամանակ անց ուսանողները որոշեցին նստացույցը փոխարինել քայլերթով։ Բողոքող ուսանողների կարգախոսն է` ազատ, անկախ ուսանող: Ի դեպ, դասադուլին միացել են նաև որոշ դասախոսներ:
Ուսանողների երթն առաջնորդում է մայրաքաղաքի դպրոցներից մեկի զինղեկը։
Բողոքի քայլերթին միացել են Հայաստանի ազգային պոլիտեխնիկական համալսարանի, Խաչատուր Աբովյանի անվան մանկավարժական համալսարանի, Երևանի պետական բժշկական համալսարանի, Երևանի թատրոնի և կինոյի պետական ինստիտուտի, Հայաստանի պետական տնտեսագիտական համալսարանի, Հայ-Ռուսական (Սլավոնական) համալսարանի և այլ հաստատությունների ուսանողներ։
Հիշեցնենք, որ արդեն մեկ շաբաթից ավելի է ՀՀ–ում ցույցեր են ընթանում` ընդդեմ Սերժ Սարգսյանի վարչապետության։
Ապրիլի 22–ին ՀՀ վարչապետ Սերժ Սարգսյանի և «Ելք» դաշինքի ղեկավար Նիկոլ Փաշինյանի ձախողված բանակցություններից հետո, բողոքի ցույցերն ավելի մեծ թափ ստացան։
Արցախի փողոցում բախումներ սկսվեցին ոստիկանների և բողոքի ակցիայի մասնակիցների միջև, ինչից հետո ակցիայի կազմակերպիչներին` Նիկոլ Փաշինյանին, Արարատ Միրզոյանին և Սասուն Միքայելյանին բերման ենթարկեցին, ապա ձերբակալվեցին։
Դատախազության տարածած հայտարարության համաձայն` նրանք բռնվել են հանրորեն վտանգավոր արարքների կատարման պահին, մասնավորապես՝ ապրիլի 13-ից կազմակերպել և անցկացրել են հավաքներ՝ անտեսելով լիազոր մարմնի՝ Երևանի քաղաքապետարանի կողմից սահմանված սահմանափակումները: Իսկ 2018թ. ապրիլի 19-ից 22-ը Երևան քաղաքի տարբեր վարչական շրջաններում կազմակերպել են հավաքներ, որոնց մասին օրենքով սահմանված կարգով չեն իրազեկել լիազոր մարմնին:Հանրապետության հրապարակում երեկ հանրահավաքը կայացել է առանց կազմակերպիչների։