Նելլի Դանիելյան, Sputnik.
Ընտանեկան ողբերգությունից մինչև սպանություն
Հուլիսի 26-ի կեսգիշերին Արմավիրի մարզի Դալարիկի ձորում հայտնաբերվել էր մարզպետի խորհրդական Մանուկ Սիմոնյանի դին։
Պարզվեց, որ Սիմոնյանն արդեն 4 օր կորած էր, ու այդ մասին ոստիկանություն ահազանգել էր նրա կինը։
Բայց հանրությանը ցնցեց ոչ այնքան պաշտոնյայի սպանության փաստը, որքան այն, որ նրան սպանել էր կինը, դիակն էլ տնից հանել ու ձորում թաքցրել որդու օգնությամբ։
Նախաքննական մարմինը հայտարարեց, որ կինն ամուսնուն կացնահարել էր քնած ժամանակ։ Պարզվեց նաև, որ կինը համատեղ կյանքի տարիների ընթացքում պարբերաբար բռնության է ենթարկվել ամուսնու կողմից։ Ընտանեկան դրաման ի վերջո ծնել էր նոր ողբերգություն, որի նախադեպը Հայաստանում չէր եղել։ Գործի քննությունն ավարտված չէ։ Ամուսնուն սպանած կնոջը սպառնում է մինչև 10 տարվա ազատազրկում։
Զանգվածային սպանություն` հոգեհանգստի սրահում
Հայաստանի հանրությանը ցնցած հաջորդ հանցանքը տեղի ունեցավ օգոստոսի 1-ին։ Վաղ առավոտյան զինված տղամարդը մտել էր Արմավիրի մարզի Շամիրամ գյուղի հոգեհանգստի սրահ ու կրակ բացել այնտեղ հավաքվածների վրա։
Դեպքի վայրում թողնելով 4 զոհ և 3 վիրավոր` հանցագործը փախել էր ու թաքնվել։ Մինչ իրավապահները կհայտնաբերեին հանցագործության համար կասկածվող Թելման Քալաշյանին, հայտնի դարձավ, որ զանգվածային սպանության պատճառը փողն էր։
2013թ–ին Քալաշյանը տոկոսով 75 000 դոլար գումար էր պարտք տվել ռուսաստանաբնակ համագյուղացի եղբայրներին։ Առաջին 2 տարվա ընթացքում Քալաշյանն անխափան ստացել էր պարտքի տոկոսները։ Բայց 2015թ–ից եղբայրների բիզնես ծրագրերը խափանվել են և նրանք չեն կարողացել վերադարձնել ո՛չ պարտքը, ո՛չ էլ կուտակված տոկոսները։
Թելման Քալաշյանը սկսել էր սպառնալ ու պահանջել իրեն պարտք մնացած 100 000 դոլարը։ Իսկ երբ հույսը կտրել էր, վերցրել էր զենքն ու գնացել այնտեղ, ուր այդ օրն ամբողջ գյուղն էր հավաքված։ Սպանվածների ու վիրավորների մեջ Քալաշյանի պարտապաններից ոչ ոք չկար։
Հանցագործությունից 25 օր անց Թելման Քալաշյանը հայտնաբերվեց ու ձերբակալվեց։ Գործի նախաքննությունը դեռ ավարտված չէ։
Չավարտվող քրեական հաշվեհարդար
Հրապարակային կրակոցներ Հայաստանում դարձյալ հնչեցին սեպտեմբերի 14-ին, այս անգամ` մայրաքաղաք Երևանի կենտրոնում` «Վերնիսաժի» մոտ, օրվա ամենամարդաշատ ժամին։
Սպանվեց Ալավերդի քաղաքի բնակիչ Գագիկ Մոսինյանը։ Իսկ քրեական հեղինակություն Վահագն Աբգարյանը` մարմնական վնասվածքներով տեղափոխվեց հիվանդանոց։
Այս անգամ սպանության հիմքում քրեական հաշվեհարդարն էր։ Ալավերդիում գործող քրեական երկու խմբավորումների ղեկավարներ, հեռավոր ազգականներ ու կյանքի բերումով ոխերիմ թշնամիներ դարձած Վահագն Աբգարյանն ու Տարոն Աբգարյանը տարիներ շարունակ միմյանց դեմ պայքար էին մղել։ 2 տարի առաջ Ալավերդիում սպանել էին Վահագն Աբգարյանի խմբի երկու անդամներին։ Ի պատասխան Վահագն Աբգարյանի մտերիմներից մեկը սպանեց սպանությունը կատարողի եղբորը։
Իսկ 2017թ–ին Երևանում իրականացրած կրակոցն ուղղված էր Վահագն Աբգարյանին, բայց սպանվեց նրա թիկնապահը։
Սպանության մեղադրանքով կալանավորված է մեկ անձ, մյուս երկուսին հայտնաբերել են Վրաստանի տարածքում, բայց Հայաստան դեռ չեն տեղափոխել։ Գործի քննություն շարունակվում է։
Պատանդառուի գնդակահարությունը
Սահմռկեցուցիչ սպանություններից բացի 2017թ–ին Հայաստանում գրանցվեցին այնպիսի հանցատեսակներ, որոնք նախկինում հայաստանցիները միայն ֆիլմերում էին տեսել։
Հանցագործին վնասազերծելու այլ միջոց չունենալով` ոստիկանությունը դեպքի վայր բերեց դիպուկահարի, որի կրակոցով, օրը ցերեկով, հավաքվածքների աչքի առաջ սպանվեց Գոռ Հակոբյանն ու ազատ արձակվեց պատանդառված կինը։ Պատանդառության պատմությունը հանգուցալուծվեց` թողնելով բազմաթիվ հարցականներ` կատարվածի, գործող անձանց ու դրդապատճառների մասին։
Մանկապարտեզը` ողբերգության թատերաբ
Հոկտեմբերի 30-ին Արմավիրում տեղի ունեցավ մեկ այլ պատանդառություն։ Այս անգամ դեպքի վայրը մանկապարտեզ էր, պատանդը` երեխա։ Ոստիկանության Արմավիրի բաժինն ահազանգ էր ստացել, որ դանակով զինված տղամարդը ներխուժել է Արմավիր քաղաքի «Մանուշակ» մանկապարտեզ և դանակի սպառնալիքով մանկապարտեզում է պահում մեկ երեխայի: Ոստիկանները մեկնել էին դեպքի վայր, շրջափակել մանկապարտեզն ու սկսել բանակցել տղամարդու հետ։
Շուտով դեպքի վայրում էին նաև լրագրողները։ Հայաստանը ժամեր շարունակ ուղիղ եթերում հետևում էր փոքրիկ պատանդի ճակատագրին։
Շուտով լուրեր տարածվեցին, որ պատանդառուն նույն մանկապարտեզի վարիչի փեսան է` Արգամ Հովիկյանը։ Նա գնացել էր մանկապարտեզ` ընտանեկան խնդիրները հարթելու։ Ծեծել էր մանկապարտեզում աշխատող իրենից հեռացած կնոջն ու զոքանչին և պատանդ վերցրել 3 տարեկան երեխային։
Ոստիկանությունն այս անգամ էլ հատուկ գործողություն իրականացրեց, բայց առանց զոհերի։ Երեխան փրկվեց։ Պատանդառուն ձերբակալվեց։ Գործի քննությունը դեռ ավարտված չէ։
Հ.Գ. Չսպասելով ընթացող նախաքննությունների ավարտին, պարզապես մակերեսորեն ծանոթանալով դրանց դրդապատճառների հայտնի մանրամասներին, կարող ենք անել մեկ եզրակացություն. բոլոր նոր հանցագործությունները ծնվում են նախկինում պատշաճ լուծում չստացած խնդիրներից։