Հայ–թուրքական սահմանի բացումը կնվազեցնի ՀՀ որոշ ճյուղերի մրցունակությունը. Գևորգ Պապոյան
18:01 20.09.2025 (Թարմացված է: 18:08 20.09.2025)
© Sputnik / Aram Nersesyan
Բաժանորդագրվել
Գևորգ Պապոյանի խոսքով` Հայաստան–Թուրքիան սահմանի բացման օգուտը լինելու է Թուրքիայի Միջերկրական ծովի նավահանգիստներին հասանելիություն ունենալը։
ԵՐԵՎԱՆ, 20 սեպտեմբերի – Sputnik. Հայ-թուրքական սահմանի բացման արդյունքում Հայաստանի տնտեսությունն ընդհանուր առմամբ կշահի, սակայն որոշ ճյուղերի հետ կապված մրցունակության խնդիր կառաջանա։ «Քաղաքացիական պայմանագիր» կուսակցության 7-րդ համաժողովից հետո լրագրողների հետ ճեպազրույցում այս մասին ասաց ՀՀ էկոնոմիկայի նախարար Գևորգ Պապոյանը։ Նա վստահեցրեց, որ ՀՀ տնտեսության ներուժն ընդլայնվելու է։
«Որոշակի ճյուղերի հետ կապված կարող է մրցունակության խնդիր առաջանալ, սակայն կառավարությունը լուծումներ ունի։ Առաջինը՝ կառավարությունն աջակցող միջոցառումներ կձեռնարկի, մի կողմից՝ կարճաժամկետ՝ նրանց մրցունակությունն ապահովելու համար, մյուս կողմից՝ երկարաժամկետում վերափոխման համար։ Եթե X գործով զբաղվելն այս պահին շահեկան է, մյուս պարագայում Y-ն է ձեռք տալիս, ապա պետք է տեղափոխվել Y-ի, հատկապես, եթե Y-ն ավելի շահեկան է։ Այսինքն՝ պետք է լինի տրանսֆորմացիա, ինչը բոլորի համար չէ, որ հեշտ կարող է լինել, որովհետև պետք են տեխնոլոգիաներ, գիտելիքներ և այլն»,– ասաց Պապոյանը։
Նա նշեց, որ Թուրքիայի հետ սահմանի բացումը տնտեսական մի շարք առավելություններ կտա, օրինակ` ՀՀ-ում չարտադրվող և ներկրվող ապրանքների գները կնվազեն։
«Հայաստանի ամենամեծ օգուտը լինելու է Թուրքիայի` Միջերկրական ծովի նավահանգիստներին հասանելիություն ունենալը»,– ասաց նա։
Էկոնոմիկայի նախարարի խոսքով` այդ նավահանգիստների հասանելիության բացակայությունն էականորեն նպաստել է ՀՀ ներմուծվող ապրանքների գների բարձրացմանը և ՀՀ-ից արտահանվող ապրանքների մրցունակության անկմանը։
