Ո՞ր բնակավայրերն են Լոռու և Տավուշի մարզերում հայտարարվել աղետի գոտի
12:17 28.05.2024 (Թարմացված է: 12:19 28.05.2024)
Բաժանորդագրվել
Լոռի և Տավուշի մարզերում տեղացած հորդառատ անձրևների հետևանքով արտակարգ իրավիճակ է առաջացել։
ԵՐԵՎԱՆ, 28 մայիսի – Sputnik. ՀՀ կառավարության որոշմամբ հստակ սահմանվել են Լոռու և Տավուշի մարզերի մի շարք համայնքներում հայտարարված աղետի գոտիների ճշգրտված տարածքները։ Տեղեկությունը հրապարակված է e-gov հարթակում։
Նշենք, որ մայիսի 26-ին տեղացած հորդառատ անձրևների հետևանքով հեղեղումներից հետո Լոռու և Տավուշի մարզերում առաջացել է արտակարգ իրավիճակ։ Այնտեղ մի շարք համայնքներ հայտարարվել են աղետի գոտիներ:
Աղետի գոտիներն ու դրանց տարածքներն են` ՀՀ Լոռու մարզում` Թումանյան համայնքի Թումանյան քաղաքը, Փամբակ համայնքի Ձորագետ և Վահագնաձոր գյուղերը, Ալավերդի համայնքի Ալավերդի, Ախթալա, Շամլուղ քաղաքները, ինչպես նաև Թեղուտ, Հաղպատ, Ճոճկան, Մեծ Այրում, Նեղոց, Շնող, Փոքր Այրում, Քարակոփ գյուղերը, Տաշիր համայնքում էլ` Տաշիր քաղաքն ու Դաշտադեմ, Մեծավան, Նորաշեն, Սարատովկա գյուղերը։ Աղետի գոտի են հայտարարվել նաև Լոռու մարզի Ստեփանավան համայնքի Ստեփանավան քաղաքը, Գյուլագարակ համայնքի Արմրակից և Հոբարձի գյուղերը։
Տավուշի մարզում էլ Դիլիջան համայնքի Դիլիջան քաղաքն ու Հաղարծին գյուղն են աղետի գոտի հայտարարվել, ինչպես նաև Իջևան համայնքի Իջևան քաղաքը, Աչաջուր, Գանձաքար, Գետահովիտ, Դիտավան, Լուսաձոր, Խաշթառակ գյուղերը, Նոյեմբերյան համայնքի Արյում քաղաքը, Արճիս, Բագրատաշեն, Դեբետավան, Հաղթանակ, Պտղավան գյուղերը։
Հիշեցնենք, որ կառավարությունը հորդառատ անձրևներից հետո առաջացած հեղեղումների հետևանքները վերացնելու համար մարզպետարաններին 300 մլն դրամ կհատկացնի։
