Մի՛ անտեսեք ՀՀ իշխանությունների ճնշումները. բողոքի ակցիա ԵՄ գրասենյակի մոտ

ԵՐԵՎԱՆ, 29 ապրիլի – Sputnik. Երևանում ԵՄ գրասենյակի դիմաց բողոքի ակցիա է ընթանում, ցուցարարները, որոնց թվում նաև ընդդիմադիր գործիչներ կան, պահանջում են, որ ԵՄ կառույցներն աչք չփակեն ՀՀ կառավարության գործողությունների վրա և բարձրաձայնեն այն ճնշման մասին, որ կիրառվում է ընդդիմադիր ուժերի, ոչ իշխանամետ լրատվամիջոցների և ակտիվիստների նկատմամբ։

Երեկ հայտնի դարձավ, որ Հայաստանի 6 քաղաքական ուժեր Երևանում կայանալիք Եվրոպական քաղաքական համայնքի գագաթնաժողովին մասնակցող պետությունների ղեկավարներին և ԵՄ ղեկավարությանը նամակ են հասցեագրել` ներկայացնելով երկրում տիրող իրավիճակը և նշելով, որ ԵՔՀ գագաթնաժողովի անցկացումը Երևանում հղի է վտանգավոր քաղաքական ուղերձի հղումով, այն է` ժողովրդավարական նահանջը կարող է անտեսվել, երբ դա քաղաքականապես հարմար է։

Ընդդիմադիր ուժերն այսօր նամակ հանձնեցին ՀՀ–ում ԵՄ–ի դեսպանին։

ԱԺ «Պատիվ ունեմ» խմբակցության պատգամավոր Աննա Մկրտչյանը, որը նույնպես մասնակցում է այսօրվա ակցիային, ընդգծեց, որ Եվրոպական կառույցներն ու հանձնաժողովները քաջատեղյակ են Հայաստանում ստեղծված իրավիճակից։

Նրա խոսքով՝ Եվրոպական կառույցներն իրենց նամակի կարիքը չունեն և իրենց տարեկան զեկույցներում հստակ փաստաթղթավորում են Հայաստանում իշխանություններից կախյալ դատական համակարգի գործողությունները, շինծու, քաղաքականացված քրեական գործերը և մարդու իրավունքների խախտումները։

«Խնդիրն այն է, որ համարժեք արձագանք չկա, քանի որ նրանք բավականին հավատարիմ են Փաշինյանին», - լրագրողների հետ զրույցում ասաց պատգամավորը։

Նրա խոսքով՝ ընդդիմադիր քաղաքական ուժերի բազմաթիվ անդամների մոտ կա տպավորություն, որ այսօր եվրոպացիները մտահոգված չեն իրենց հռչակած արժեքներով, մարդու իրավունքներով և ազատություններով։

«Բարգավաճ Հայաստան» կուսակցության անդամ Արման Աբովյանն էլ շեշտեց, որ Վարշավայում, Փարիզում և Բրյուսելում գտնվող եվրոպացիները պետք է իմանան, որ հայերը դեմ են իրենց ինքնությունից զրկելու փորձերին։ Հայերը չպետք է դառնան քաղաքական հետապնդումների և կամայական գործողությունների առարկա։

ՀՀԿ փոխնախագահ Արմեն Աշոտյանն էլ ուշադրություն հրավիրեց այն փաստի վրա, որ Հայաստանում երբևէ այսքան քաղաքական, գաղափարական տարաձայնություններ ունեցող կուսակցություններ չեն միավորվել, մի հարցի շուրջ իրենց ձայնը չեն բարձրացրել։ Բայց այսօր նման համախմբումը փաստում է, որ այդ կուսակցությունների անդամները մտահոգված են երկրում ստեղծված իրավիճակով։

«Այսօր մեր քաղաքացիների իրավունքները ոտնահարվում են հանուն գեոպոլիտիկ սակարկման։ Այսօր մենք հանձնում ենք նամակ Հայաստանում Եվրամիության ներկայացուցչության ղեկավարին՝ պարոն Վասիլիս Մարագոսին․․․ Այս նամակում զետեղված են 6 հիմնական ուղղություններ, առաջին 4-ը վերաբերում են մարդու իրավունքներին, քաղաքական հետապնդումներին, եկեղեցու վրա հարձակումներին և մամուլի ազատությանը, իսկ վերջին 2-ը վերաբերում են Բաքվում գտնվող մեր հայրենակիցներին, Արցախի ռազմաքաղաքական ղեկավարության պատանդառությանը և արցախահայության խնդիրներին»,-ասաց Աշոտյանը։

Նա ընդգծեց` իրենց պահանջն է, որ Հայաստանում ազատ արձակվեն բոլոր քաղբանտարկյալները, իսկ Բաքվում՝ հայ գերիները։ Ընդդիմադիրներն ակնկալում են, որ մայիսի 4-ին և 5-ին սպասվող բարձրաստիճան հանդիպումների ժամանակ ԵՄ անդամները կբարձրաձայնեն Հայաստանում տիրող հակաժողովրդավարական վիճակը և հանդիպում կունենան եվրոպական քաղաքական անդամություն ունեցող այլ կուսակցությունների ներկայացուցիչների հետ ևս։

Նա կոչ արեց իշխանությունների ներկայացուցիչներին իրենց ակցիան չհամարձակվել անվանել հակաեվրոպական, քան որ իրենց ակցիան պրոարժեքային է։

Հիշեցնենք, որ Երևանում մայիսի 4-ին կայանալու է Եվրոպական քաղաքական համայնքի 8-րդ գագաթնաժողովը։ Դրան կհաջորդի Հայաստան–Եվրոպական միություն առաջին գագաթնաժողովը, որը տեղի կունենա մայիսի 5–ին։ Այդ օրերին Հայաստան է ժամանելու մոտ 50 բարձրաստիճան պատվիրակություն, այդ թվում` Եվրոպական խորհրդի նախագահ Անտոնիու Կոշտան և Եվրահանձնաժողովի նախագահ Ուրսուլա ֆոն դեր Լայենը:

Երկօրյա այցով գագաթնաժողովին մասնակցելու նպատակով Հայաստան կժամանի նաև Ֆրանսիայի նախագահ Էմանուել Մակրոնը: