ԵՐԵՎԱՆ, 11 ապրիլի – Sputnik․ «Միավորված հայեր» կուսակցության պատվավոր նախագահ Նաիրի Սարգսյանը չի պատրաստվում պատգամավորական աթոռ զբաղեցնել։ Նա այդ մասին ասաց «Ուժեղ Հայաստան Սամվել Կարապետյանի հետ» դաշինքի հանրահավաքից առաջ՝ մեկնաբանելով նախընտրական ցուցակում իր անվան բացակայությունը:
Ավելի վաղ ԶԼՄ-ները ուշադրություն էին դարձրել այն փաստին, որ «Ուժեղ Հայաստան» կուսակցության հրապարակած նախընտրական ցուցակի առաջին 36 թեկնածուների մեջ չկան «Նոր դարաշրջան» կուսակցության նախագահ Հարություն Հարությունյանի և «Միավորված հայեր» կուսակցության պատվավոր նախագահ Նաիրի Սարգսյանի անունները, որոնց հետ նախորդ շաբաթ հուշագիր ստորագրվեց «Ուժեղ Հայաստան Սամվել Կարապետյանի հետ» անվանումով դաշինք կազմելու մասին։
«Մենք ունենք որոշումների կայացման ռացիոնալության ելակետ։ Պետք է առաջնորդվել առկա վարկանիշների պոտենցիալով, իսկ այդ պոտենցիալն ունի միայն «Ուժեղ Հայաստան» կուսակցությունը։ Ես ի սկզբանե չպետք է այնտեղ լինեի։ Կարևոր չէ՝ դաշինքով, թե առանձին մասնակցությամբ, իմ նպատակը երբեք պաշտոն զբաղեցնելն ու պատգամավորական գործունեությունը չի եղել»,- ասաց Սարգսյանը։
Նրա խոսքով՝ ցուցակում կուսակցության այլ ներկայացուցիչներ կան, հանրահավաքի ժամանակ ցուցակը կներկայացվի։
Սարգսյանն ընդգծեց` իրենց գործունեությունն ուղղված է այս իշխանության վերացմանը, և դա չի ենթադրում, որ իր պատգամավոր ընտրվելը պարտադիր է։
Նա անդրադարձավ նաև «Ընտրական օրենսգիրք» օրենքում կատարված փոփոխությանը, որով արգելվում է անձնանունների կիրառումը կուսակցությունների, դաշինքների անվանումներում։
Սարգսյանը շեշտեց` Սամվել Կարապետյանի անունը հանելն էլ չի կարող խոչընդոտ լինել ժողովրդի համար, որ իրենց ճիշտ ընտրությունը կատարեն։
Հիշեցնենք` ՀՀ–ում հերթական խորհրդարանական ընտրությունները կկայանան 2026 թվականի հունիսի 7-ին։
Մասնակցելու վերաբերյալ արդեն հայտարարել են ՀՀ 2–րդ նախագահ Ռոբերտ Քոչարյանը, Երևանի նախկին քաղաքապետ Հայկ Մարությանը` իր «Նոր ուժ» կուսակցությամբ, ՀԱԿ–ը, որի վարչապետի թեկնածուն Լևոն Զուրաբյանն է, «Հանրապետություն» կուսակցությունը` Արամ Սարգսյանի գլխավորությամբ։ «Ուժեղ Հայաստան» կուսակցությունը առաջիկա խորհրդարանական ընտրություններին կմասնակցի դաշինքով, որը կկոչվի «Ուժեղ Հայաստան Սամվել Կարապետյանի հետ»։ Ընտրություններին մասնակցելու է նաև ԲՀԿ–ն, որի առաջնորդ Գագիկ Ծառուկյանն իր «Առաջարկ Հայաստանին» ծրագիրն ուզում է «Նոյյան տապան» դարձնել ընդդիմադիր ուժերի համար։
Մարտի 30–ին հայտնի դարձավ, որ իշխող «Քաղաքացիական պայմանագիր» կուսակցությունն առաջիկա խորհրդարանական ընտրություններում վարչապետի թեկնածու է առաջադրել Նիկոլ Փաշինյանին։