Սպիտակ տանը հայտարարել են, թե Իրանի նկատմամբ ԱՄՆ-ն հաղթանակ է տարել

ԵՐԵՎԱՆ, 8 ապրիլի - Sputnik. Սպիտակ տանը հայտարարել են Իրանի նկատմամբ ԱՄՆ-ի հաղթանակի մասին։

«Սա Միացյալ նահանգների հաղթանակն է, որը տարել են նախագահ Թրամփն ու մեր անհավատալի զինվորականները։ «Էպիկական կատաղություն» գործողության ամենասկզբից նախահագ Թրամփը ենթադրում էր, որ այն կտևի 4-6 շաբաթ։ Մեր մարտիկների անհավանական ունակությունների շնորհիվ մենք մեր հիմնական նպատակներին հասանք և գերակատարեցինք 38 օրում»,-հայտարարել է ԱՄՆ նախագահի մամուլի քարտուղար Քերոլայն Լևիթը X սոցիալական ցանցում։

Բացի այդ, ինչպես նշել է Լևիթը, Թրամփը հասել է Հորմուզի նեղուցի բացմանը։

​«Երբեք չպետք է թերագնահատել նախագահ Թրամփի` Ամերիկայի շահերը հաջողությամբ առաջ մղելու և խաղաղության հաստատմանը նպաստելու ունակությունը»,-եզրափակել է նա։

ԱՄՆ նախագահ Դոնալդ Թրամփն իր հերթին հայտարարել է, որ Մերձավոր Արևելքում «ոսկեդար» է սկսվել։

​Իրանի հետ ժամանակավոր զինադադարի մասին համաձայնագիրը նա անվանել է հաղթանակի օր և հավելել, որ Վաշինգտոնը կօգնի հաղթահարել տրանսպորտային կոլապսը Հորմուզի նեղուցում։

«Մեզ բազմաթիվ դրական փոփոխություններ են սպասվում։ Հսկայական կարողություն կաշխատենք։ Իրանը կկարողանա ձեռնամուխ լինել վերականգնմանը։ Մենք կսկսենք ամեն տեսակի պաշարներ կուտակել և պարզապես մոտակայքում կլինենք՝ համոզվելու համար, որ ամեն ինչ ընթանում է այնպես, ինչպես հարկն է»,-գրել է ԱՄՆ նախագահը։

Ավելի վաղ հաղորդվել էր, որ ԱՄՆ նախագահ Դոնալդ Թրամփը համաձայնել է երկու շաբաթով կասեցնել Իրանի ուղղությամբ հարվածները և հավաստիացրել է, որ հրադադարը կլինի երկկողմանի։ Իրանի Ազգային անվտանգության գերագույն խորհուրդը հայտարարել է, որ Թեհրանը ԱՄՆ-ի հետ բանակցություններ կսկսի ապրիլի 10-ին, Իսլամաբադում (Պակիստան)։ Իրանական կողմը հայտարարել է, որ Միացյալ Նահանգները ստիպված են եղել ընդունել Թեհրանի 10 կետից բաղկացած առաջարկը, որը ներառում է պատերազմի դադարեցում բոլոր ճակատներում, այդ թվում՝ Լիբանանում իսլամական դիմադրության դեմ։